Director di KIA, Rocco Tjon y Terry Gumbs a entrega e diploma na 11 detenidonan cu a sigui e curso di saca golpi y spuit auto.

Esaki a tuma luga den Biblioteca dilanti tur esunnan cu a forma parti di e ekipo cu a organisa e curso aki, incluyendo e director y representante di Enseñansa pa Empleo. Na momento di firma e diploma, Ramon Coffy y Gregory Croes tabata presente hunto cu personal di KIA y e graduadonan.

E detenidonan/studiantenan tabata motiva y a pidi pa sigui cu cursonan den KIA. “Tin biaha tin cu motiva mas, pero p’esey sr. Tjon ta ocupa pa trece otro profesionalnan banda di e profesionalnan cu ta den cas caba”, asina sr. Gumbs, Mediawerkers schooling en vorming, a expresa. Asina aki lo forma un ekipo fuerte, cu sa di motiva empleadonan y clientenan pa asina por bay dilanti. Tambe pa duna contenido na e programa di resocialisacion y e integracion na KIA.

Cu e proyecto aki lo kier logra yuda detenidonan den KIA y despues tambe e nazorg lo por sigui. KIA ta na mesa cu Reclassering y otro organisacionnan manera AHATA y ATA, pa mira si nan por coopera pa duna e clientenan un di 2 oportunidad cu un trabou, den un esfuerso conhunto pa logra rehabilita pa nan por sigui nan bida y duna bek na comunidad.

Sr. Coffy a ricibi training for di sr. Croes, representante di Enseñansa pa Empleo, y el a acerca su persona pidiendo Enseñansa pa Empleo un aporte pe hoben nan encarcela den KIA.

Sr. Croes a yega KIA y a yuda sr. Coffy pa duna nan e certificado y diploma. Nunca el a drenta KIA y semper sr. Croes a duna curso pafo, pero pa prome biaha eyden, e ta haya cu e mucha hombernan ta bon educa. Nan tabata aporta na loke tabata siña nan, asina e representante di Enseñansa pa Empleo a expresa. Pa loke ta e trabou cu nan kier eherce y e training duna, ta kere cu na momento cu nan sali for di KIA nan lo por haci e trabou di spuit auto.

Trahado di siguridad di KIA, sr. Coffy a splica cu e prome grupo cu a atende un curso di lassen di Wilfrido Dubero. Despues di esey a cuminsa di biaha cu e curso di spuit y saca sla (uitdeuk). E team ta consisti di 5 persona cu ta facilita e curso y siña e hobennan pa bay dilanti. “Nos ta haya cu e ta bayendo bon. Tur ta saliendo perfecto”, el a duna di conoce. Ta purba di haci miho posibel y ta resultando, esunnan cu kier ta sigui e les y bay dilanti.

Sr. Coffy hunto cu su grupo ta siña e studiantenan manera nan a haya les, con cosnan ta bay. El a gradici señora Corman di MIPA y Complete Out of Care, Gregory Croes, kende a pone confiansa 100% den su persona hunto cu MIPA.

Director Tjon tabatin confiansa den sr. Coffy, kende a sinta cu sr. Croes pa traha riba un plan di kico nan lo haci. Sr. Croes a percura pa haya e materialnan di sponsor pa duna les den KIA. Pa loke ta e autonan cu nan a spuit, e director a percura pa haya esaki nan como sponsor. Di aki e curso a cuminsa.

Na KIA hende por a hiba auto y e presonan ta traha riba dje, pero awo cu 11 preso gradua den spuit auto ta keda na e director pa habri e garashi bek y pa por duna servicio bek.