Un tata rabia a maltrata un maestro di Commandeur Pieter Boer School na San Nicolas pa motibo cu e no por a subi tereno di scol pa duna e treat na su yiu cu a haci aña. E trahado di KIA a benta e maestro abou y dal e varios biaha. Recientemente nos a haya informacion cu e mayor aki a wordo deteni.
Minister di Enseñansa a condena esaki y ta bisa cu ‘violencia na porta di scol ta un asunto cu e ultimo añanan ta lantando cabes’.
E incidente a tuma luga diabierna merdia. E maestro mester a bay hospital pa tratamento medico. Segun un relato for di e departamento di minister di Enseñansa, e incidente a haci un ‘impacto grandi na e scol, tanto cu e docentenan, alumnonan y mayornan cu a lamenta masha e hecho aki.’ Ministerio di Enseñansa ta bisa cu nan a tuma accion ‘mesora pa garantisa cu autoridadnan ta investiga e caso aki den forma profundo, pa evita cu tin ripiticion y pa por lo menos mengua e trauma cu tur di e scol ta bibando cu ne aworaki’. E minister ta bisa cu esaki ta ‘inaceptabel’. “Nos no lo tolera algo asina pasa bou di ningun circunstancia na esunnan cu ta educa muchanan, y e actitud di violencia aki na scol lo carga consecuencia severo.”
Segun e mandatario por mira mas y mas casonan di violencia na scol den e ultimo añanan. Y cu gobierno ta traha duro pa preveni. Tin scolnan cu a pone siguridad, construi curanan halto, sistemanan di alarma y mucho mas. “Pero nos ta mas interesa den inverti den educacion, den buki di scol, en bes cu cada bes mester gasta mas placa na cosnan cu no tin nada di haber cu enseñansa mes.”
Dos aña pasa docentenan di e scol basico Colegio Santa Filomena na San Nicolas a pone trabou abou un rato pa pidi atencion pa e aumento di violencia na scol. Nan a haya sosten di coleganan di otro scolnan. E docentenan a bisti na preto, asina mustrando nan solidaridad cu e cabesante e tempo ey di Filomena cu wordo agredi door di par di muchanan riba e tereno di scol.
