Mediante un comunicado di prensa, Cuerpo di Polis di Aruba a informa cu Unit Narcotica ta continua activo riba caya pa loke ta trata bendemento di droga na unda cu diahuebs ultimo y ayera diabierna dos entrada hudicial a tuma luga relaciona cu esaki.

En conexion cu un investigacion andando pa Unit Narcotica, diahuebs ultimo a tuma luga un entrada hudicial den e bario di Jucuri y a detene un hende homber Colombiano di inicialnan O.D.T.J. di 35 aña di edad.

E investigacion a sigui su curso y ayera mainta trempan a tene un otro entrada hudicial den rancho en conexion cu e mesun caso. Akinan a detene un hende homber cu inicialnan J.J.M.G di 41 aña di edad. Na e sitio a haya un cantidad grandi di cocaina, marihuana y piedra. Tur esakinan a ser confisca pa mas investigacion.

E investigacion ta basa riba sospecho di exportacion di droga pa exterior. Cuerpo di Polis tambe a informa cu nan no ta descarta mas detencion y entrada hudicial pa Unit Narcotica. Tabata dia 17 di augustus na Macuarima unda nan a detene dos persona, un hende homber di inicialnan J.E.G. y un hende muhe S.F.Y.F tur dos nacionalidad Hulandes. Igualmente 18 di augustus den ora nan di atardi relaciona cu e mesun caso team di aresto a haci un entrada hudicial na un cas na Bushiri. Akinan a detene 1 homber J.H.G.M. di nacionalidad Colombiano y tambe a detene un persona indocumenta.

26 di augustus tambe Cuerpo di Polis a informa tocante e detencion di un otro persona relaciona cu bendemento di droga, esaki ta relaciona cu e mesun caso di dia 25 di julio ora nan a haci un otro razzia na Kamay y Kurimiuaw.

Unit Narcotica ta un unidad di Cuerpo Policial Aruba cu oficialmente a ser lanta dia 1 augustus 2023, e unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu ta intercepta pa Aduana, US Customs na aeropuerto, door di ambtenaarnan di KIA tambe tur droga encontra durante cualkier control policial. Unit Narcotica ta resorta directamente bao di Commisario di Algemene Dienst.

Pa Cuerpo Policial Aruba por resolve mas caso nan ta pidi cooperacion y informacion di pueblo di Aruba cu ta hopi importante, p’esey si algun lector tin cualkier informacion por yama di forma anonimo na e tiplijn di Polis cu ta: 11141.