Segun Ngo Chun Luk, tratadonan internacional ta prescribi cu si detene peticionario di asilo esaki mester tin un motivacion fuerte. Por ehempel pa percura cu hende no ta disparce mientras ta tramita nan peticion. Sinembargo e detencion mester ta proporcional cu e meta pa cual ta detene. Detencion indefini ta contra tratadonan y gobierno mester por motiva e duracion di detencion suficientemente.
Diahuebs ultimo a tuma luga un evento na Universidad di Aruba (UA) unda Ngo Chun Luk, alumno gradua na nivel di masters di facultad di ley (FDR) di UA y na Maastricht University cu PhD conhuntamente cu Kelly Bendelow, protection officer di e agencia di refugiado di Nacionnan Uni (UNHCR) a papia tocante derechonan di refugiadonan y peticionario di asilo (asielzoekers).
Durante Chun Luk su presentacion, mirando cu e topico aki ta uno sensibel y cu mas y mas ta hayando atencion bou comunidad, el a pidi publico presente pa asumi cu personanan – cual den caso di Aruba ta primordialmente di Venezuela – cu ta pidi asilo ta huy di situacionnan ta huy pa via cu nan bida lo ta den peliger den cualkier manera.
Informacion valioso cu Chun Luk a comparti cu publico ta encera con e derechonan specifico di refugiadonan y peticionario di asilo ta hinca den otro. Por ehempel ki derechonan por deriva na Aruba, mirando cu e isla ta participa den e protocol di refugiado di 1967, pero tambe ta aplicabel EVRM (Declaracion Europeo di derechonan humano) y otro convenionan Europeo manera e convenio contra tortura.
Aki a haci distincion entre derechonan humano, cual ta conta pa tur hende, y derechonan di personanan pidiendo status di refugiado. E derechonan aki ta adicional na derechonan humano y ta inclui e derecho di no pasa den proceduranan di deportacion, entre otro.
Detencion di peticionario di asilo solamente bou condicionnan estricto
Algun punto importante cu a menciona ta encera por ehempel cu na momento cu detene personanan cu haci peticion pa asilo den centro di detencion esaki mester tuma luga bou condicionnan stricto. E detencion mester ta proporcional (evenredig) na e tempo cu por ehempel mester procesa un peticion, ademas cu unda e detencion ta tuma luga mester ta adecua y personanan deteni mester haya suficiente acceso na cuminda, awa, etc.
Gobierno mester, apart di duna informacion riba con e procedura di asilo tin cu cana, tambe motiva cualkier detencion di persona cu lo kier bira un refugiado, pues no por detene personanan sin tin bon rason pa haci esaki, por ehempel pa percura cu nan no ta disparce.
Investigacion na Merca ta mustra cu tuma refugiado ta boost economia
Durante Kelly Bendelow su presentacion a enfoca riba e aspecto di integracion. Di varios investigacionnan cu ta haci na Merca y demas paisnan por mira cu tuma refugiadonan of otro categorianan di migrante ta duna un boost na economia. E manera con esaki sa pasa ta masha simpel: Migrantenan ta tuma trabounan den posicionnan mas abou riba nivel organisatorio mientras mas espacio ta keda e ora ey pa localnan cu tin hopi biaha educacion specialisa y conocemento di nan idioma.
Despues di e charlanan tabatin un sesion di interaccion cu publico unda varios persona a haci pregunta relaciona cu loke a presenta. Luc Alofs, historiado, por ehempel a enfrenta Bendelow su referencianan academico, mirando cu ta referi primordialmente na Merca, cual naturalmente lo tin un situacion diferente si compara e pais su grandura cu esun di Aruba.
