Huez Comisario mr. D.J. Jansen diasabra pasa a dicidi pa no honra e peticion di abogado di e sospechoso principal den caso Avestruz, parlamentario O.B. Sevinger, pa suspende e extension di su detencion cu 60 dia, tuma e dia anterior, riba peticion di Ministerio Publico.
Abogado di e sospechoso, mr. D. Kock, a pidi esaki di forma verbal riba dia 19 di juni, diasabra, y a tuma lugar un audiencia via videoconference, unda ambos partido tabata presente, e sospechoso tambe acompaña pa su abogado.
Huez Comisario Jansen a rechaza e peticion di abogado di e sospechoso pa suspende e detencion, considerando cu, tumando na cuenta e ‘strafdossier’ cu el a mira, y tambe informacion y circunstancianan di e caso, y principalmente tumando na cuenta e gravedad di e hecho y fundamentonan, cu e interesnan di procesamento penal actual ta pisa mas cu e interesnan personal treci dilanti di banda di e sospechoso.
E disposicion aki tin como consecuencia cu e sospechoso no lo keda den libertad mas promer cu eleccion, y un posible peticion di parti di Ministerio Publico pa suspende e detencion ta parce un posibilidad remoto actualmente. Den e otro casonan relaciona cu Avestruz navarios ocasion Fiscal mes a haci peticion pa suspende detencion, pero esey ta na momento cu ta considera cu pa interes di e investigacion no ta necesario pa continua e detencion.
