Den un comunicado pa medionan di comunicacion local, Ministerio Publico a informa cu detencion di sospechoso Sevinger, den caso Avestrus, no a keda prolonga manera a informa anteriormente. Sino cu e suspension inicial no a termina ainda.
Ademas, a informa cu riba peticion di Ministerio Publico, e siman aki huez-comisario a suspende condicionalmente e detencion di e sospechoso P. Th. A. S. den investigacion Avestrus.
Huez-comisario a pone como un di e condicionnan cu S. no mag di tin contacto cu otro sospechosonan, y cu e tin cu coopera cu e investigacion.
Durante transcurso di ayera, OM a informa tocante con e investigacion di e Caso Avestruz ta continua, nan a menciona cu hues comisario a duna ordo pa detencion (gevangenhouding) di Sevinger a keda prolonga pa cu 60 dia mas. Sinembargo, esaki a resulta di no ta corecto. Por confirma cu Sevinger ainda ta den e periodo inicial di detencion di 18 dia, ya cu e detencion inicial aki di 18 dia no a termina ainda. Segun OM a clarifica, no a prolonga detencion di Sevinger.
Cu esaki, ainda ta keda duda riba algun rumornan cu tabatin den algun medio di comunicacion riba libertad di Sevinger prome cu eleccion, cu lo tuma luga dia 25 di juni.
