(Reuters) – E cantidad di migrante gara ta crusa e frontera entre Merca y Mexico ilegalmente den maart a cay na e nivel mas abao cu a mira, segun cifranan inicial publica pa gobierno Mericano diamars.
U.S Customs and Border Protection a bisa den un comunicado di prensa cu e data actualmente ta demostra cu alrededor di 7,180 migrante a keda deteni na e frontera den maart, cual lo ta e total mensual mas abao cu tin den record. E cantidad di detencion di migrante den maart a baha di un averahe mensual di 155,000 durante e ultimo 4 aña segun e agencia a comenta.
Segun CBP, e cifranan final di maart lo keda publica den e dianan binidero. “Agentenan di patruhaye na e frontera ta empodera manera nunca antes pa preveni entrada ilegal y proteha e bida di Mericanonan,” Comisario di CBP Pete Flores a bisa den e comunicado.
Presidente Donald Trump, un Republicano, a tuma un cantidad di accion pa desencurasha crusamento ilegal na e frontera despues di a bolbe e Cas Blanco dia 20 di januari, bisando cu accion ta necesario despues di nivelnan halto di migracion mira bao President Democratico Joe Biden.
Trump su accion ta inclui trupanan militar y implementacion di prohibicion di asilo na e frontera. Su medidanan ta construi riba algun iniciativa cu ya caba tabata na caminda durante ultimo añanan di Biden su mando, incluyendo un prohibicion similar contra asilo y un empuhe pa aumenta implementacion Mexicano. E medidanan aparentemente a reduci e crusamento ilegal.
U.S Border Patrol su estadisticanan ta bay te na aña 2000. E cantidad mensual mas abao cu a yega di mira den record tabata 8,347 luna pasa. Prome cu esey, e cantidad mas abao den total cu tin den record ta den luna di april den 2017 ora cu e agencia a detene 11,127 persona na comienso di Trump su prome termino.
Mientras cu e cantidad di detencion na frontera a cay di manera similar durante Trump su prome presidencia – cual algun a yama e ‘efecto Trump’ – algun luna y aña despues e cifranan a aumenta back.
Potret di Reuters.
