Ayera merdia hues comisario a indica cu detencion di G.F.B., ex-minister plenipotenciario di Aruba na Hulanda, ta wordo extendi cu 16 dia mas. Despues cu e ta deteni pa 8 dia caba, hues comisario a extende e detencion cu dos biaha 8 dia mas, 16 dia en total, te ora cu por finalisa tur e investigacion y/of interogacionnan necesario.
G.F.B. a keda deteni dia 13 di februari ultimo relaciona cu e investigacion di e caso Tulipan cu ta dirigi su mes riba iregularidadnan na Arubahuis den e periodo di 2018 te 2021. Ta acus’e di corupcion y abuso di poder como minister plenipotenciario durante e periodo menciona.
E investigacion di caso Tulipan a cuminsa, segun Prome Minister Evelyn Wever-Croes a splica, cu un e-mail cu el a ricibi di forma anonimo di un grupo di personal di Arubahuis na september 2021 dirigi na henter Conseho di Minister cu copia na cierto parlamentarionan cu ta haci mencion di posibel iregularidadnan cu por a tuma luga na Arubahuis, pero e e-mail aki no tabatin pruebanan pa por cuminsa investiga, segun loke el a sigura.
Den mesun luna ey, a bin un otro e-mail cu contenido y prome minister a expresa cu mesora a tuma contacto cu CAD, cu DRH y Conseho di Minister pa trata e tema aki y a cuminsa un investigacion inmediatamente na Arubahuis
Den luna di october 2023 a entrega un keho penal na Ministerio Publico contra e ex minister plenipotenciario G.F.B. pa malversacion di placa di Pais Aruba den e caso Arubahuis.
Durante G.F.B. su caso civil e aña aki hues a bay di acuerdo pa retira G.F.B. for di su funcion di polis aunke e la comete abuso di su funcion den calidad di minister plenipotenciario, pero ta di opinion cu tambe por pone e straf aki den su calidad di polis. Tambe hues a bisa cu G.F.B. su accionnan cu e la haci, no ta haci’e apto pa traha como polis mas ni como un funcionario publico.
Den e sentencia ta indica cu e motibo di retiro disciplinario ta basa cu G.F.B. a comete un infraccion grave di loke tabata su deber y for di su actuacion a surgi dudanan di loke ta trata su integridad.
