Ayera den oranan di atardi, tabatin un detencion di un sospechoso relaciona cu investigacion di caso Flamingo. Ministerio Publico a confirma e detencion, y a comenta cu no ta descarta cu ta bay tin mas detencion den e caso.
“Ayera Landsrecherche a detene un sospechoso den e investigacion Flamingo”, Ministerio Publico a informa den un comunicado di prensa. “E muher E.F. ta wordo sospecha di envolvimento den iregularidadnan den otorgamento di terenonan erfpacht.
E investigacion ta continua. No ta exclui mas detencion.”
Manera lectornan di Bon Dia Aruba por recorda, caso Flamingo a keda conoci na 2020, na momento cu Ministerio Publico a tene varios entrada den cuadro di un investigacion penal tocante posible delitonan di corupcion y otro hechonan castigable vincula na otorgamento di tereno comercial erfpacht den periodo di 2017 te 2019. E investigacion ta trata di posible soborno y corupcion pa obtene optie pa tereno. Tempo cu e caso a bira conoci, un di e sospechosonan mas notorio tabata ex-minister Otmar Oduber.
