Ministerio Publico (OM) ta informa cu ayera tardi polis a detene un persona riba sospecho di ta envolvi den e morto violento di e hoben S. Sierra riba 3 di november 2017. E sospechoso a wordo poni den detencion y lo wordo hiba e siman aki ainda dilanti hues comisario. Mas informacion ainda nos no a haya.
Caso
E victima a wordo haya morto den su cas na De Vuyst. A resulta cu el a wordo mata. Un team special di recherche di Cuerpo Policial di Aruba a investiga e caso aki na forma intensivo y riba escala grandi, bao guia di Ministerio Publico. E resultadonan di e investigacion aki a hiba finalmente pa detencion di e sospechoso. OM ta laga sa cu durante e investigacion a scucha bastante testigo, tambe den e bario. Di e autopsia mes no a bisa mucho cos segun nan vocero. Pa loke ta trata e parti di violacion e ta dificil pa wak na un curpa sin bida si tabata tin violacion of no, segun OM. Claro cu por tin cierto indicacionnan, por ehempel cu el a wordo haya sin paña. Pero na e curpa mes ta dificil pa wak nan ta splica. P’esey a tuma muestranan durante e autopsia. Esakinan a wordo manda NFI (Nederland Forensisch Instituut) pa investigacion. Na man di e muestranan ey lo por determina e parti aki. Tabata sperando awo resultado di esakinan cual segun OM a yega siman pasa. Nos a puntra nan si e muestranan a duna algun indicacion cu tabata tin abuso sexual of algo otro, cual OM a contesta cu: “Nan tabata mas tanto dirigi riba haya un match di DNA. NFI su trabao tabata pa yega na profielnan di DNA, cu lo mester wordo compara cu DNA cu ta dispone di dje.”
Click akinan pa lesa tocante e caso:
Mucha muhe sofoca cu saco di plastic haya den cas pa famia
