Mediante un comunicado di prensa, Ministerio Publico (OM) a indica cu ayera, hues a dicidi pa prolonga e detencion di e sospechoso S.R.K. pa un termino di 90 dia. E sospechoso aki a keda identifica den medionan local como chauffeur di prome minister demisionario.

“Hues a dicidi awe, riba peticion di Fiscal di Husticia, pa duna ordo pa detencion (gevangenhouding) di e sospechoso S.R.K. pa un termino di 90 dia, den cuadro di un investigacion di delitonan sexual,” OM a bisa den su comunicado di prensa. “Prome cu e periodo aki termina, e sospechoso mester wordo presenta (pro-forma) dilanti Corte den Prome Instancia.”

Caso contra K.

Manera ta conoci, diamars 4 di maart ultimo a tuma luga detencion di un empleado publico cu pa e ultimo añanan a fungi como chauffeur di Prome Minister Evelyn Wever-Croes. E sospechoso ta cera den KIA, segun noticieronan local.

Mirando e caso y acusacionnan manera indica pa Ministerio Publico (OM), Prome Minister a confirma identidad di e sospechoso K., kende tabata fungi como chauffeur di e mandatario, y a duna comentario riba e detencion.

Comienso di luna, e mandatario a expresa cu pa su persona y e Gabinete completo, e detencion aki tabata un shock grandi, mirando cu e persona aki no solamente a traha hopi di cerca cune sino semper a sigui corectamente su tareanan como su chauffeur.

“Como Prome Minister mi a tuma nota di e caso y di e acusacionnan manera indica pa OM, y den e cuadro aki, mi ta informa comunidad te caminda ta posibel di e caso. E acusacionnan ta hopi serio, y p’esey mi ta pidi comunidad completo, un biaha mas, pa duna espacio na e cadena hudicial pa realisa e investigacion necesario.

“Mi persona ta condena fuertemente cualkier crimen, pero specialmente den e caso aki cu segun OM posiblemente tin delito sexual envolvi. Manera semper mi a bisa; cada ken mester carga su responsabilidad. Aruba ta un pais di ley y orden y ami como Prome Minister, y alabes como hurista ta comprende hopi bon cu den casonan di e indole aki, mester laga husticia prevalece. Esaki ta den beneficio di ambos banda. Segun e vocero di OM den algun dia lo tin mas informacion riba desaroyo di e caso.

“E situacion aki no ta defini Aruba, paso nos pais ta funda riba integridad, riba ley, y riba husticia, y ami ta sigui confia den husticia. P’esey mi kier a haci un peticion na un y tur pa ban duna espacio na OM pa nan haci nan trabou. Mientras un caso ta bou investigacion no por duna comentario, y sigur como Prome Minister mi ta respeta esaki.

“Den e dianan cu ta bin, mi lo sigui cumpli cu mi responsabilidad pa sigura un transicion di Gobierno responsabel y stabiel. Esaki ta mi compromiso cu bo, esaki ta mi prioridad, y esaki ta loke mi lo bay haci” Prome Minister a expresa.

Di su banda, Ministerio Publico a informa ademas cu durante e registro den cas di K. na Papilon a confisca cargadornan di informacion, como tambe seis arma di candela y un cantidad considerable di municion.

E investigacion ta continua.