Fundacion Accion Ambiental ta pidi pa para e ‘destruccion grandi’ na Sero Colorado inmediatamente pa cu construccion di hotel na e sitio.
Manera Bon Dia Aruba a skirbi un par di siman pasa, minister Benny Sevinger di Infrastructura a anuncia cu San Nicolas lo haya dos hotel nobo. Nos ta pendiente ainda di un entrevista cu e mandatario pa puntra mas detaye. Locual si nos a compronde ta cu gobierno a duna un tereno na un compania local sinembargo segun minister den prensa, e hotel ta di un cadenainternacional.
Fundacion Accion Ambiental awor a manda nos potretnan di trabou cu ta wordo haci awor na Sero Colorado (area ariba na Baby Beach). “Accion Ambiental ta haya cu e destruccionnan ambiental y ecologico como tambe di nos rikesanan historico y natural a punto di extremo no por sigui destrui nos Aruba mas. No destrui cuebanan,tunnel di awa, mina di fosfaat y sitionan di indjannan preceramico.”
Segun e fundacion nan a haci boramento haci riba diabierna y diasabra pasa den un manera ‘ilegalmente’. “Pasobra ora habitantenan di Sero Colorado y testigonan na Baby Beach a yama polis nan a sigui toch pero door di reaccion di nos organisacion y comunidad y prensa, e mashin di bora a cambia di sitio dialuna mesora, esta pa Pos Chiquito pa cu Green Corridor.”
Mientras cu diadomingo e mashin di bora tabata poni pafo di Sero Colorado y Colony, segun e fundacion. Accion Ambiental ta bisa cu no ta prome biaha cu nan a para construccion cu ta destrui naturalesa na Aruba. “Pa loke ta Sero Colorado e areanan na unda kier traha hotel ariba baranca ,full e area ey mester keda area proteha pa nos rikesanan historico y natural cu tin bou di sub suelo como tambe areanan cu tin di indjannan preceramico.”
Caminda legal
E fundacion ta bisa cu for di aña pasa nan ta bon documenta di tur loke tin bou di e sub suelo ‘danki na e Mericanonan cu tabata biba den Sero Colorado y Colony nan semper a lucha pa conserva e areanan ey cu tin un rikesa historico y natural’.
“Si gobierno y desaroyadonan sigui, nos di Accion Ambiental lo cuminsa cu un campaña internacional y nos lo cana e camindanan legal tanto local como internacional via instancianan internacional pa para e destruccion.”
pa medio di su presidente Marcos Bislip y den nomber di directiva
