Presidente di Paraguay Horacio Cartes, a destitui su ministro di interior Tadeo Rojas y su comandante di polis Crispulo Sotelo, despues di enfrentamento cu a laga un persona fayeci  y mas di 30 herido.

E fayecimento di un politico activo di partido liberal diasabra marduga a keda graba pa camara di circuito cera di sede di e partido politico. Polis experto den motin a drenta den sede di partido liberal, den oposicion, sin un orden hudicial pa bay tras di manifestante cu tabata bringa cu efectivo di polis mas tempran riba caya di capital di Paraguay.

Diabierna a cuminsa e enfrentamento, cu a laga hopi daño y destruccion na sede di palacio legislativo, di banda di hende di partido di oposicion cu tabata hopi rabia.E situacion aki a surgi como respuesta na aprobacion cu Senado a duna na un proyecto di amienda constitucional, cu ta busca inclui e reeleccion presidencial desde proximo proceso di eleccion pa aña 2018.

Constitucion di Paraguay ta vigente desde 1992, y ta bisa cu e presidente y vice presidente no por keda eligi di nobo, bao ningun figura posibel. Cu e formulacion ey, Paraguay a purba di haya un manera pa evita un  dictadura nobo manera e sistema di gobierno di general Alfredo Stroessner, cu a goberna durante 35 aña (1954-89).

Opositornan ta pensa cu un asamblea constituyente ta unico caminda pa cambia e norma aki, y no via un amienda constitucional aproba pa congreso. Mayoria di legisladornan (25 di 45) cu ta apoya presidente Cartes y ex- presidente Lugo a desconoce autoridad di Camara halto, cu ta den man di oposicion y a constitui algo manera un Senado paralelo pa asina aproba e proyecto di amienda.

Roberto Acevedo presidente di Senado, a denuncia dilanti di corte ‘cu mayoria di legislador oficialista ta acusa di usurpacion y atentado contra constitucion”. Hugo Velasquez presidente di diputadonan a suspende e sesion cu tabata planifica pa diasabra como un via pa purba duna calma y sosiego pa grupo di oposicion. Militantenan di partido liberal, a bay na duna condolencia na un hoben di oposicion, Rodrigo Quintana, cu a ser asesina pa un polis y cu a ser dera ayera na su pueblo La Colmena, situa na 150 kilometer di La Asuncion.