Destina pa Nacionnan Uni: Minister Croes a ricibi prome Rapport di Hubentud Aruba

Riba dia Internacional di Hoben, Presidente di ATHA, Franklin (Rene) Ridderstaat, hunto cu Director di ATHA Cyndi Kelly-Mathilda y drs. Caroll Kock (Cordinadora di Proyecto) a haci entrega di e Youth Report y NGO Report na Minister di Asuntonan Social y Labor.

Minister Glenbert Croes a haya un splicacion di e resultadonan, y tambe di e proceso cu ta bay continua pa loke ta e Youth y NGO rapport. E mandatario ta aplaudi cu ATHA a scoge pa traha hunto cu tur organisacionnan na Aruba pa yega na e reportahenan cu ta di vital importancia pa nos pais, cumpliendo cu e lista di problemanan prome cu raporta (List of Issues Prior to Reporting; LIOPR) relaciona cu e situacion di Derecho di Mucha na Aruba.

Tambe Croes ta elogia y ta gradici tur hoben cu a contribui cu nan opinion di con nan ta biba y experencia nan derechonan aki na Aruba.

Cada 5 aña tur pais ta haya oportunidad pa raporta riba e situacion di Derecho di Mucha di nan pais na e Comision di Derecho di Mucha na Geneve, Suiza. E biaha aki, Asociacion Trabao di Hubentud Aruba (ATHA) a tuma e reto pa traha riba 2 reportahe pa Aruba. ATHA conhuntamente cu organisacionnan miembro y no miembro di dicho asociacion, a entrega loke nan ta topa cerca di mucha y hoben pa loke ta nan derecho. Tambe ATHA a uza e oportunidad pa entrevista hobennan vulnerabel den diferente bario y a haci uzo di un encuesta na scol cu a wordo yena via tablet.

Croes y ATHA ta yama danki na tur organisacion cu a duna nan aporte durante e lunanan cu a pasa y cu a haci posibel pa Aruba entrega su prome NGO Report y prome Youth report na ‘Committee on the Right of the Child’ (Comite pa Derecho di Mucha) na Geneve. E procedura di e reportahe a wordo maneha, dirigi y skirbi pa drs. Caroll Kock cu sosten di Mariela Chirino (boluntario di ATHA) y Gina Vrolijk (stagiaire di EPI Welzijn). E rapport di NGO tabata financia y sosteni pa CEDE Aruba.

Pa logra e prome Youth Report den historia di Aruba, ATHA a conta cu e sosten financiero di UNICEF Nederland, CBS cu a pone disponibel tablet pa por a haci e encuesta y tambe Setar cu tambe a pone algun tablet disponibel pa e encuesta. Tur hoben cu a participa nan nomber a bay den tombola y asina tin e oportunidad pa gana un tablet pa cortesia di Setar.

E mandatario a vocifera su admiracion y aprecio pa e trabou cu ATHA a desplega. Segun un comunicado di gobierno, Croes a keda impresiona cu tur locual ATHA y tur asociado, boluntario y contribuyentenan a logra. Cu e datonan entrega, lo por enfoca miho riba loke ta e necesidad di nos hoben – y nos muchanan. “Nos mester empodera nos hobennan. Nan derecho ta sagrado y nos t’ey pa salvaguardia esaki” ta e compromiso cu e mandatario a vocifera.