Despues manifestacion Pro Siguridad a tende nada mas for di gobierno

– Comision Pro Siguridad, e organisado di e manifestacion grandi riba 13 di october contra criminalidad y insiguridad na Aruba, ta pidi ayudo di parlamento. 

 

Nan no ta tende nada mas for di gobierno desde e dia ey nan a entrega un manifiesto y a yega un acuerdo cu gobierno. 

 

“Nos comision a dicidi di acudi na nos parlamento, pa urgi nos dirigentenan enfoca nan atencion ariba siguridad.” Un di e motibonan ta cu parlamento a cuminsa trata e presupuesto 2017 desde dialuna y e comision ta bisa cu nan no a tende di e nota di cambio cu gobierno a priminti pa aumenta e presupuesto di husticia cu 10 miyon florin. 

 

“Nos ta pidi parlamento como e instancia cu mester controla gobierno, pa yama

minister Dowers pa rindi cuenta pa loke ta referi su maneho di husticia. Esey ta

parti di e trabou di parlamento di Aruba”, asina Tatiana Eman Mallarino y Hubert Dirks di e comision ta bisa. Nan a manda un carta ayera pa parlamento pa mustra riba esaki. 

 

Riba e dia di e manifestacion cu a pone 700 pa 100 hende riba caya,  prome minister Mike Eman a invita e comision pa sinta na mesa di biaha y nan a yega na un palabracion riba tres punto: 

 

1. Pa declara siguridad como prioridad y zero tolerancia contra criminalidad y ilegalidad.

2. Pa gobierno compromete su mes pa aumenta presupuesto 2017 pa combati criminalidad cu 10 miyon adicional.

3.Reforsa cuerpo policial pa comunidad conta cu mas polis riba caya