Falta di awa limpi y acceso na servicionan medico ta haci cu e areanan den Caribe afecta pa horcan Irma, ta den peliger di un ‘outbreak’ di malesanan epidemico manera tyfus (keintura) y Leptospirosis (bacteria) y tambe dengue, chikungunya y zika.

Pa motibo di esey e organisacion di salud PAHO ta yuda e islanan afecta, entre otro tambe St. Maarten. Nan a manda un gran cantidad di expertonan riba terenonan di entre otro infrastructura medico, higiena, epidemiologia. E islanan a indica nan demandanan pa remedi y PAHO ta mandando nan e cantidadnan necesario. Hopi di e facilidad ta destrui. E centro medico na St. Maarten si ta den operacion bek sinembargo nan tin acceso dificil na awa, segun e organisacion.

Un otro punto cu PAHO ta haya ‘vital’, ta cu mester cambia personal trahando den cuido den e areanan afecta frecuentemente. Tambe nan ta haya ‘vital’ cu tin un control epidemico pa detecta cualkier plamamento di malesanan manera menciona ariba den e fase aki.

Destruccion na aeropuertonan, wafnan y camindanan ta un reto pa duna asistencia humanitario. Sinembargo forsanan militar ta yuda PAHO pa logra yega caminda unda tin necesidad. E organiscion Pan Americano ta pidi paisnan y teritorionan cu no ta afecta den e region pa duna sosten tambe.

Un par di estadistica:

– 32 miyon hende den Caribe ta biba den areanan cu por enfrenta biento di 60km/ora

– 2 miyon hende den Caribe ta biba den areanan cu por enfrenta biento di 120km/ora

– 5.8 miyon hende den Caribe awor ta afecta pa horcan Irma (fuente:Unicef)

Salud despues di un horcan
E organisacion mundial WHO a emiti un imagen informativo cu tipnan pa salud, kico mester haci despues di un horcan. Entre otro por yuda asina evita plamamento di malesanan. Pa esunnan cu tin famia of conoci na St. Maarten of otro areanan afecta den Caribe of na Merca, esaki por uza pa informa nan tambe. E dianan aki por lesa varios caminda informacion of expresionnan cu ta crea e impresion cu Aruba ta pafo di e zona di horcan. Cual no ta berdad: Aruba ta cay den zona di horcan. Pa motibo di esey instancianan manera Cruz Cora y Bureau Rampenbestrijding tin plannan di calamidad pa ta prepara riba un horcan.

Sinembargo manera Bon Dia Aruba a trece dilanti aña pasa ora nos tabata bou menasa di horcan Omar, e plan di calamidad no ta completo y ta falta hopi ainda. Entre otro un cooperacion oficial y bon regla entre Cruz Cora y Bureau Rampenbestrijding/gobierno.