Despues di un campaña di sterilisacion exitoso den bario di Madiki, Paws Uni Aruba ta preparando pa aborda e siguiente desafio, cual ta bira e bario di Dakota. Den luna di october Paws Uni Aruba ta drenta den Dakota y continua cu e nan campaña di sterilisacion.

Den luna di juni Zoey Conijn di Luna Foundation Aruba a introduci Paws Uni Aruba, un iniciativa pa yuda cu e problema fuerte di cacho y pushi riba caya. Den luna di augustus Paws Uni Aruba a drenta den Madiki pa sterilisa mas hopi cacho y pushi posibel y asina yuda e doñonan di mascota cu no tabatin accesibilidad pa haci esaki pa motibonan financiero.

Despues di yuda 534 cacho y pushi di e bario di Madiki, aworaki Paws Uni Aruba ta preparando pa drenta den bario di Dakota den luna di october.

“Nos a keda keto pa un rato, pero nos ta hopi ocupa formando nos siguiente campaña na Dakota. Un bario cada biaha. Nos a realisa cu ora bo no ta enfoca den un bario, bo ta keda haya e mesun problema cada biaha. Dakota no ta un bario facil. Nos a bin ta sigui e noticianan tocante e area di cerca. E ta un bario dificil pa hende y bestia. Ta p’esey yudansa ta realmente necesario. Mester di un team mas grandi pa por yuda Dakota,” Paws Uni Aruba a publica riba nan pagina di Facebook

Nan a sigui informa cu nan lo ta den e bario e ultimo dos weekend di luna di october y e prome dos weekend di november. E meta di e campaña ta pa surpasa e cantidad di cacho y pushi cu nan a sterilisa den Madiki y bisindario.

Adicionalmente nan a informa cu e ronda aki nan no lo haci colonia di pushi na e sitio di campaña, pero nan ta bay haci esey na e clinica veterinario VSH Veterinary Specialty Hospital Aruba riba un otro fecha durante e mesun periodo.

Paws Uni Aruba ta consisti di 11 fundacion cu a uni hunto cu veterinario VSH y Stimami Sterilisami pa bay bario pa bario pa sterilisa e mascotanan. E meta ta cu e fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.

E fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.

Potret: Facebook Paws Uni Aruba