Despues di un proceso di negociacion largo: CAO di 3 aña pa trahadonan di Hospital ta den fase final

Un cantidad di tempo a wordo hinca den e proceso di negociacion di un contracto colectivo (CAO) nobo pa e trahadonan di Horacio Oduber Hospital (HOH), pero finalmente un luz cla ta wordo mira, ya casi na final di e proceso aki.

Nan ta negoshando un CAO pa un periodo di 3 aña, caminda directiva di hospital mester convence AZV pa aloca un suma cu ainda no ta cla. Un suma pa atende cu mehoracion di salario directo of indirecto, mediante condicion di trabou cu sindicato ABV ta bin negosha den nomber di su miembronan.

Fase final
Segun Mediador di Gobierno, Anselmo Pontilius, e partidonan ta den un fase final, y e proyeccion ta pa e CAO nobo aki pa 3 aña lo wordo firma pa mas tarda entre 15 of 20 di september. Sinembargo, esaki no ta kita afo cu tin asuntonan cu e partinan mester atende pa motibo di e dinamismo cu un hospital manera esaki tin. Ademas, aparte di tur e retonan cu e trahadonan a pasa aden debi na e trabou di renobacion di expansion di infrastructura di hospital.

Pontilius, kende den su rol di mediador a brinda su intermediacion, ta reconoce cu e proceso di negociacion di e CAO aki no ta uno facil. No ta un situacion financiero facil pa hospital pa determina un aumento di salario repentino. Of pa nan por logra mas entrada pa por cumpli cu su compromisonan. Principalmente pa un di e dunadonan di trabou mas grandi di pais Aruba cu ta depende di entradanan -casi exclusivamente di un suma anual di alrededor di 160 miyon di florin – cu ta bin for di AZV. E ta un suma producto di e belasting cu ta specificamente p’e. Un suma cu HOH mester atende cu tur su gastonan salarial y operacional.

Otro factor cu a contribui pa e proceso aki a bira uno largo, tin di haci cu na inicio di e proceso di negociacion -na fin di aña pasa- a surgi algun incidente entre directiva di sindicato ABV y director di HOH, cu a haci cu esaki a para pa un rato. Despues nan a continua, pero meymey di un situacion dificil pa negosha un CAO pa un grupo di mas cu mil trahado di hospital.

Mediador di Gobierno a bisa cu e negociacion aki a demanda hopi pasenshi, tanto di gerencia di hospital como di directiva di sindicato ABV pa atende cu un situacion asina, ya cu ta logico cu e trahadonan kier mira mehoracion den nan salario directo, pero tambe den condicionnan di trabou. ABV a dedica hopi tempo pa mehora condicion secundario di e trahadonan di HOH, entre nan seguro, pensioen, etc.