Aña pasa ministerio di Husticia y Asuntonan Social a lansa e proyecto “Veilige Barios”. Pa e proyecto aki Gobierno di Aruba firma un MoU cu tur e centronan di bario y CEDE Aruba. Durante un conferencia di prensa ayera mainta, minister di Husticia y Asuntonan Social a elabora mas tocante e proyecto y kico tur a logra cumpli durante un aña cu a pasa despues di su lansamento.
Minister Tjon a splica cu e proyecto aki ta consisti di aporte di diferente ministerio y ta enfoca riba diferente grupo. A traves di e proyecto aki a percura pa restructura e manera con e centronan di bario ta wordo financia pa nan haci mas cu e recursonan cu nan ta haya.
E proyecto ta ser realisa den cooperacion cu CEDE Aruba tambe pa e centronan di bario haya otro tipo di sosten pa nan por opera miho y aloca mas recurso.
El a indica cu aworaki e centronan di bario ta conta cu personal fiho cu ta yuda guia diferente actividad cu a tuma luga na e centronan di bario. E meta di e proyecto ta pa enfoca riba diferente grupo den comunidad pa crea inclusion.
Segun e mandatario a splica, te cu aworaki, despues di un aña di e lansamento di e proyecto aki, a logra realisa 51 actividad di cual 22 ta ripiti continuamente y mas di dos mil persona ta participa na e actividadnan.
“Esaki ta un paso sumamente positivo pasobra na final di dia bo kier percura pa nos hobennan tin mas actividad cu nan por participa na dje pa di e forma ey nan no ta riba caya,” el a subraya.
Pa loke ta e actividadnan realisa na e centronan di bario, tin tayernan di teatro y arte, actividadnan deportivo, cursonan di educacion tanto pa mucha como pa mayornan, bijles pa muchanan di scol cu tin problema cu e materianan di rekenen y taal, curso di idioma pa migrantenan, actividadnan di empoderamento financiero, actividadnan fisico pa adultonan mayor y tambe ta ofrece grupo di sosten pa hende muhe.
Minister Tjon a anuncia cu en conexion cu “Veilige Barios”, pronto lo anuncia dos proyecto grandi cu ta na caminda cu lo bay crea espacionan deportivo y lo enfoca riba e parti di speeltuin pa e muchanan.
Anteriormente Bon Dia Aruba a trece dilanti e caso di centro di bario Tanki Leendert cu tabata e cas pa diferente actividad deportivo y cultural cu tabata den un estado di deterioro. Segun informacion publica, aworaki e ta den proceso di renobacion completo di e edificio y cancha deportivo pa asina por habri portanan back pronto pa comunidad di Aruba.
