Na luga di calma nervio, ta parce cu tin interes pa tene e candela cendi. Esey ta e conclusion despues di e reunion informativo di parlamento, unda cu Prome Ministro no a bin duna cuenta. El a bin duna un show bon prepara, cu mayoritariamente pregunta di su mes hendenan, lantando e sospecho cu nan a sinta hunto prepara nan.
Esaki a duna un preludio na un discurso di dos ora, cu e unico conclusion cu gobierno di Hulanda, specialmente ministro di Asunto di Reino ta un persona enemistoso cu ta sinta inventa con pa stroba e tremendo gobierno aki di haci su trabao. Y den e caso aki nan ta mira como nan trabao pa percura pa tin un gobernador di nan preferencia, punto.
Esey ta algo imposibel pa logra si bo ta den un proceso di recomendacion, unda un otro tin e decision final. Y ora bo mes ta stroba e ronda di consulta, y bo ta laga henter e asunto bay den direccion di ‘power play’, esaki bo ta haya. No ta nada straño cu e bishita na Den Haag tabata ultra-cortico y den un frega di wowo e delegacion tabata para pafo atrobe, man bashi… Lastima cu contrario na su custumber di revela su version di loke ta papia den despacho di Gobernador, awor si nos no ta haya di tende kico a papia den despacho di Plasterk. Pero pa haci e fiera cu a drenta reduci cu un factor 10, ta algo hopi fuerte el a trece dilanti.
En todo caso nos no ta mira cu tin mas opcion pa continua e conflicto directo cu Hulanda. Loke si ta keda ta e situacion di trato di e Gobernador nobo. Nos no por a tende palabra di grandeza ayera unda ta afirma categoricamente cu e Gobernador lo haya e miho trato, manera mester ta. Como ciudadano nos no por haci nada otro cu vigila henter actuacion di gobierno pa cu Gobernador di cerca y esaki pa un motibo importante: nos tin na caminda posibel momentonan dificil atrobe, unda cu por surgi problema atrobe entre gobierno di Aruba y e supervision financiero imponi pa Reino.
E pleito a start caba cu declaracion cu e presupuesto ta realistico y di otro banda comentario, entre otro di Conseho Consultivo cu esey no ta e caso. Importante den e tempo nos dilanti ta bay ta tratamento di presupuesto 2017, presupuesto complementario (y no e palabra sin base “supletorio”, un adopcion mahos di e palabra Hulandes “suppletoir”) 2016, cuenta anual 2015 y e rapport di e di tres kwartaal di e aña aki.
Na e momento aki ta facil ainda pa bisa cu e presupuesto ta realistico o di otro banda bisa cu e no ta. Hopi ta depende di con cos lo bay den e aña venidero. Si e refineria en berdad cuminsa opera den e sentido cu ta tuma hopi hende pa e trabaonan di reparacion pa por cuminsa procesa crudo aki dos aña, entradanan di gobierno por ta considerabel. Pero esey ta si…
Pasobra tur hende por mira tur dia e noticianan di e situacion financiero di e empresa madre PDVSA, cu no tin un caminda di sconde y mester acepta cu e aña aki so caba su produccion a cay cu 10%, ademas di e problemanan di prijs abao riba mercado internacional. Te awor nos ta tende comentario positivo tocante e cantidad di hende local cu a solicita, pero nada ainda di cuanto a haya trabao. No ta p’esey tabatin tanto pura pa caba di pasa tur cos den parlamento?
Pero si nos supone mes cu tur cos ta anda bon y gobierno ta cobra loke e mester cobra, e preocupacion di CAFT, di Conseho Consultivo y di hopi hende cu conoce e materia aki, ta cu gobierno ta uza tur placa extra pa gasta en bes di pone placa un banda pa paga otro cos necesario. Awor aki manera un bon ‘boekhouder’ a percura pa yega riba papel exactamente na e deficit di 0,5% di GDP. Bunita, pero no ta asina cu tur aña bo tin e famoso ‘suppletoire begroting’ pasobra semper tin mas gasto cu loke a premira? Claro cu nan ta bisa cu nan lo tin cobertura pa esey di entrada extra, pero si no tin?
E pregunta ta atrobe unda nan por haya e tipo di regalo manera aña pasa na SVb, unda a laga nan hendenan den e conseho supervisor propone gobierno pa regala su mes un pordon di mas di 60 miyon, pasa e ley y tin e pudor di yama e cos ey un “kwijtschelding”! SVb no tin poder pa pordona ningun debe, ta gobierno a bay parlamento pa regla e regalo!
En todo caso, nos ta na dos aña y pico di e welga di hamber y mientras cu gobierno a cumpli te awor cu e normanan respectivo di deficit pa 2015 y 2016, esey no a para e fiamento y nos debe publico ta yegando na 86% di GDP. Y si no tin cambio di rumbo, lo tin guera na caminda cu e supervision financiero auto-imponi.
