E buskeda pa e vuelo MH370 di Malaysia Airlines a termina diamars ultimo despues di casi tres aña y esaki sin por a encontra un solo rastro di e avion. Segun comunicado di MH370 Tripartite Joint Communique, diamars cu a pasa e team di buskeda a bandona e area y termina nan buskeda riba un superficie total di 46.000 miya cuadra den Oceano Indico, completando e buskeda di mas compleho, mas costoso y mas misterioso den historia di aviacion.
Varios fragmentonan di diferente partsnan di e avion a laba yega na costa di Africa Oriental, pero e esfuersonan pa localisa e restonan principal di e avion hunto cu e black box, a fracasa. E tres Paisnan cu a financia e buskeda oceanico cual ta Australia, Malasia y China a bay di acuerdo aña pasa pa sospende e buskeda actual, al menos cu surgi pruebanan nobo cu ta señala e localidad di e avion.
E noticia aki no a cay den mucho bon tera cerca e familiarnan di e victimanan abordo e avion MH370 y a pidi e autoridadnan concerni pa sigi amplea e buskeda. “No por permiti pa avionnan comercial desaparece sin laga ningun rastro”, Voice370 a bisa, cual ta e Asociacion oficial pa e famianan di e pasaheronan y tripulacion desapareci.
E CASO
E Boeing 777 a desaparece dia 8 de maart na aña 2014 cu 239 persona a bordo, mientras cu e tabata riba ruta di Kuala Lumpur rumbo pa Beijing. E personan abordo di e aeroplano Boeing 777 tabata tin entro otro nacionalidad Americano, Australiano, Canades, Chines, Hulandes, Frances, Hindu, Indones, Iranes y Malasianes.
