Despues di reuni cu Futuro y PPA, Informador LaSorte ta conclui prome reunionnan cu tur partido cu a saca asiento den eleccion

Ayera, lider di partido Futuro, Gerlien Croes y lider di partido PPA, Otmar Oduber a tene reunion cu informador Tisa LaSorte pa sondea e posibilidadnan pa forma un coalicion pa gobierno. Cu esaki, e prome ronda di reunion cu informador a keda completa.

Segun portal noticiero NoticiaCla a informa, na salida di su reunion, Croes a indica cu ta bay inicia combersacion cu tur partido cu a saca asiento den ultimo eleccion, y cu ta bay cuminsa cu e partido cu a ricibi mas voto, AVP.

Croes a indica cu ta bay cuminsa explora den e parti di contenido, hibando combersacion cu e partidonan “y mira con leu nos ta yega.” Croes a enfatisa cu, respetando resultado di eleccion, ta dispuesto pa sinta cu tur partido.

Segun Croes a bisa NoticiaCla, no ta posible pa un di e partidonan no ta compatible cu Futuro – indicando cu tanto MEP como AVP ta compatible.
Finalmente, Croes a bisa cu e tin apertura pa e idea di nombra un vak minister den e proximo gabinete.

Di su banda, lider di PPA, Otmar Oduber a bisa NoticiaCla cu “e tabata un reunion hopi interesante.” El a confirma cu enfoke di e combersacionnan a riba e programanan di partido. Pero el a bisa cu pa garantisa stabilidad di gobernacion, lo ta ideal pa inclui su partido, PPA, den e coalicion ademas di e otro dos partido. Segun Oduber, su plan di partido tambe ta alinea cu esun di e otro partidonan

Mirando cu Oduber ta un sospechoso den caso Flamingo, esaki ta nifica cu e no lo por asumi un funcion di minister den e proximo gobernacion. Sentencia den caso Flamingo ta spera pa dia 22 di januari 2025. Oduber a bisa NoticiaCla cu si PPA drenta den coalicion di gobierno, lo asigna “naturalmente un persona cu sea ta un vak minister of cu ta un persona riba nos lista pa carga e responsabilidad” den e periodo prome cu sentencia den caso Flamingo. Despues di e sentencia lo por tin un miho bista si Oduber lo asumi un rol como minister of como Parlamentario.

E siguiente paso den e proceso di formacion di coalicion, ta algun reunion y combersacion mas entre e partidonan y e informador, y na final di esaki, informador LaSorte lo traha un rapport pa entrega na Gobernador tocante su hallazgonan.