Despues di resultado di eleccion, ken mester sinta den Parlamento di Aruba?

Mientras e partidonan cu a ricibi mayor cantidad di voto y a logra haya asiento den Parlamento di Aruba pa proximo periodo ta negocia pa forma un coalicion, votadornan ta puntra nan mes ken lo mester representa cada partido como minister y parlamentario.

Durante campaña, diferente partido a indica cu e resultado di eleccion ultimo, cu a tuma lugar dia 6 di december, lo trece “sorpresa” cune. E sorpresa tabata realmente cuanto partido a bay atras den voto y cuanto partido a perde nan asiento. Cu apenas cuatro partido cu a logra representacion den parlamento, e pregunta ta bin dilanti con legitimo e representacion di cada persona ta bay ta den caso cu nan drenta como parlamentario.

E pregunta aki varios lector di Bon Dia Aruba a trece dilanti, expresando preocupacion pa motibo cu masha poco candidato a logra un sosten fuerte den cantidad di voto. Den esaki por destaca partido Futuro, cu a marca historia como e prome partido ‘chikito’ pa saca tres asiento, y a haci esaki den su prome eleccion tambe. E duo di lider Gerlien Croes y Geoffrey Wever (ex-minister di partido Raiz), a proba di ta uno poderoso y a gana confiansa di pueblo pa nan imagen como un partido cu plannan realistico. Mientras cu Croes y Wever a logra miles di voto (4,492 y 1,903 respectivamente), ningun otro candidato riba nan lista a goza mucho sosten. Number 3 riba lista, Gino Goeloe, a logra apenas 297 voto, y number 4, Ruthlyn Lindor, 176. Y ningun di e otro seis candidato a logra yega ni sikiera 100 voto.

Partido Futuro, cu su tres asiento, ta den negociacion actualmente pa forma un gobierno di coalicion. Si esaki logra, por asumi cu e partido lo ricibi tres, dos, of a lo menos un ministerio den e siguiente gobierno. Pero si esaki ta e caso, ken lo bira minister y ken lo bira parlamentario pa e partido? Den e caso mas optimista, si Futuro tin tres minister, si Croes y Wever asumi e ministerionan, esey ta nifica cu e siguiente minister lo ta un persona cu menos di 300 voto. Y e ora nan tres parlamentario lo mester bira un persona cu 176 voto y otro dos cu menos di 100 voto cada un. Maske ta normal cu e lider di partido ta ricibi proporcionalmente hopi mas voto, e duda ta si por considera cu nan ta echt representando e boluntad di pueblo na momento cu no tin un sosten amplio pa e candidatonan.

Igual ta conta pa partido AVP. Den caso cu nan forma un coalicion, por imagina cu lo mester tin como minimo cuatro minister. Top di e partido, Wendrick Cicilia (4,894), Mike de Meza (1,476), Arthur Dowers (1,075), y Stephany Sevinger (1,347), tur a logra mas cu mil voto, hunto cu Mike Eman, kende a logra 5,277 voto. Pero esey toch lo nifica cu e nuebe parlamentario di e partido ta candidatonan cu a ricibi hopi menos sosten, manera Mervin Wyatt (652), Jennifer Arends (507), Clifford Heyliger (295), Sonaly Fernandez (396), Carlos Bermudez (230), Alfred Sneek (234), Otami Thomasia (253), y Jonathan Hart (108).

Y den caso cu forma coalicion cu partido MEP, ta bin tambe e problema unda e ministernan saliente lo drenta back den gobernacion a pesar cu e gobierno actual a perde sosten. Den caso cu e top 4 cu mas voto den e partido geel bay como minister – Evelyn Wever-Croes (6,474), Dangui Oduber (2,714), Xiomara Maduro (1,053), y Endy Croes (1,662) – esey lo nifica cu minister Endy Croes, kende mester a bandona su cartera demisionario pa motibo di un mocion di desconfiansa, lo bolbe drenta gobierno. Y excluyendo Rocco Tjon (1,035), Hendrik Tevreden (771), y Edgard Vrolijk (505), E resto di e politiconan di MEP tampoco a logra gana mucho voto: Shailiny Tromp (348), Setty Christiaans (262), Alvin Molina (125), Sharissa Arends (347), Rodymar Geerman (302), Marco Berlis (218), Aldrin Lampe (186), Natalie Geerman (352), Roderick Hoek (155), Shannon Henriquez (98), Erwin Lopez (143), Erich Genser (103), Michella Steenvoorde (52), Nataly Arends (28), Shirley Rafini (151), Stephanie Croes (15), Jaime Winterdaal (16), Nolan Thomas (36), Juancito Geerman (120), Jeffry Schullenburg (92), Rene Kock (75), Marceylaine Paskel (122).

Pa loke ta partido PPA, cu nan un asiento, si bay solamente den Parlamento, por bisa si cu Otmar Oduber tin sosten grandi den pueblo cu 2,419 voto. Pero den caso cu Oduber bay den coalicion di gobierno y sinta como minister, e ora number 2 riba lista di PPA, Eduard Pieters, lo sinta como representante di pueblo den Parlamento, mientras cu apenas a ricibi 148 voto.

Mientras cu miles di voto di ciudadanonan di Aruba a bay den e sistema di restzetel pa partidonan cu mas cantidad di voto, si mira e personanan mes cu lo mester representa pueblo, e pregunta ta keda si e sistema realmente ta representa e boluntad di pueblo, y si e personanan cu ricibi e responsabilidad pa representa pueblo den Parlamento, realmente tin e sosten corespondiente.