Durante ultimo simannan, ya por a premira cu poco poco Aruba tabata acercando 200 caso activo un biaha mas. Ayera a surpasa e cifra aki, despues cu DVG a informa cu a registra un total di 50 caso nobo.
Den su resumen diario riba e cifranan di Covid-19 na Aruba, Departamento di Salubridad Publico DVG a informa cu ayera a registra 50 caso nobo di Covid-19, di cual 46 ta residente y 4 no ta residente. Cu esaki, e cantidad di caso activo a yega na 206, mientras cu e tasa di positividad (‘positivity rate’) a keda na 31%, cual ta hopi halto. Expertonan den epidemiologia ta sugeri cu e tasa di positividad mester keda alrededor di 5%. Un resultado cu por a pronostica mirando e varios sitio na Aruba unda por a nota aglomeracion di hende, cu ya tabata dunando señal na momento cu e cantidad di casonan activo tabata keda riba 100.
Di su banda, hospital Dr. Horacio Oduber a informa cu tin un total di seis persona interna. Di esakinan dos ta den Unidad di Cuido Intensivo y cuatro ta isola riba piso general.
DVG a comenta: “Cu aumento di casonan pa dia, Crisis Team a anuncia e medidanan cu lo ta na vigor pa e proximo dianan. E medidanan aki ta necesario pa yuda reduci contagio y baha e cantidad di casonan. Crisis Team ta monitor continuamente desaroyo di e virus y comportacion di nos comunidad y pa cual motibo ta premira cu si no actua awo pa frena e posibilidad di contagio, Aruba lo habri aña 2021 cu un ‘3th wave’ loke lo costa nos no solamente nos economia pero lo mas doloroso cu ta bida di mas ciudadano.”
