(local10.com) – E crucero Carnival Freedom a bay back na Miami ayera, despues cu un grupo di pasahero a test positivo pa coronavirus, loke a ocasiona cambio na e schedule di biahe di e crucero.
E barco crucero a sali for di Miami dia 18 di december ultimo. Despues di retrasonan durante e parada na Corsou dia 21 di december, e paradanan programa pa dia 22 di december na Bonaire y dia 23 di december na Aruba a keda cancela.
Dia 24 di december, e crucero a stop na Republica Dominicana. Ashley Peterson a usa Twitter pa conta tocante su mal experiencia abordo. “Hende a paga miles di dollar pa e crucero aki y a scoge e crucero aki pa e paradanan. Awo riba un crucero di 8 dia nos a bay solamente un lugar riba un schedule retrasa”, Peterson a skirbi.
Pasaheronan a ricibi un carta di disculpa for di capitan di e barco crucero, ademas di un regalo di credito di $100 pa cada camber y un carchi di Bingo. Peterson no a considera esey como compensacion suficiente.
“E transmision rapido di variante Omicron tin impacto riba e manera con destinacionnan ta resppondiendo na hasta cantidad chikito di casonan”, e capitan di e barco a skirbi den e carta dia 22 di december.
Tabatin 2,497 pasahero y 1,112 miembro di tripulacion abordo di e barco.
Jim Skorupski a bisa cu ningun persona a revela cuanto hende a test positivo pa e virus, y tabatin cantidad di rumor. “Nos a scucha diferente storia. Nos a tende cinco. Nos a tende diesdos. Nos a tende binticinco,” Skorupski a bisa despues di baha for di e barco.
E linea di crucero a reporta di a manda actualisacionnan na e Centro pa Control y Prevencion di Malesa Mericano (CDC). E barconan Symphony of the Seas y Odyssey of the Seas di Royal Caribbean tambe recientemente tabatin pasahero- y miembronan di tripulacion kende a test positivo pa coronavirus.
