Den weekend a tuma luga e concierto tan spera di e ‘Rey de la Bachata’, Romeo Santos. Un publico di mas di cinco mil persona tabata presenta pa disfruta di un repertorio di e canticanan mas popular di e artista internacional, pero esaki no prome cu nan mester a warda mas di cuater ora pa e artista a subi escenario.

E anochi a cuminsa cu presentacion di e artista local internacional, Jeon, cu subi ariba tarima pa presenta un variedad di su cancionnan, tanto nobo como canticanan bieu, cu e publico conoce y cu a canta hunto cune.

Segun informacion oficial, Jeon mester a presenta na principio, locual el a haci y despues na final, ora cu Romeo Santos lo a caba di canta, pero esaki lamentablemente no tabata e caso.

Despues di Jeon su presentacion, publico tabata cla pa ricibi e ‘Rey de la Bachata’ riba escenario, pero e artista no a subi e tarima te cu 4or di marduga.

Segun e artista mes a splica ora cu e tabata riba escenario, un eventualidad for di man y “no excusabel” a tuma luga na unda algun di e musiconan y ekipo di produccion, di e artista no a yega Aruba si no te despues di 1or di marduga.

El a splica cu nan no a logra haya avion pa e ekipo aki y cu nan a dura cinco ora pa nan por a haya avion pa trece e ekipo for di Peru pa Aruba. Romeo a disculpa su mes cu e publico di Aruba, cu, mester remarca, tabata bastante disgusta y cansa p’e retraso grandi aki.

“E produccion tabata bin di Peru,” Santos a bisa. “Nos no a haya un avion pa trec’e, na ultimo minuut nos mester a busca un avion como plan B.” El a agrega cu e “dos opcion cu tabatin ta cancela e show, of canta 4or di mainta.” E cantante a bisa cu e ta compronde cu e publico ta cansa y ta disgusta, “mi ta bolbe pidi disculpa na boso tur cu hopi cariño, cu hopi respet,” agregando cu no ta culpa di e publico, y cu “boso merece tur, tur respet y boso tin e, y p’esey mi ta disculpa infinitamente cu boso.”

Prome cu e artista a subi tarima tin hopi hende cu a cansa di warda y a bandona e sitio prome cu nan por a wak e artista presenta su cancionnan.

Pa 4or di marduga Romeo Santos a start su show y e publico cu tabata presenta a disfruta di tur e cancionnan di a artista internacional, cu a pesar di e retraso, a duna un gran presentacion.

Ariba rednan social e comentarionan tabata di disgusto pa e espera di mas di cuater ora, pero na mesun momento hopi a duna elogio na e promotornan di evento pa nan esfuerso pa haci posibel cu Romeo por a subi escenario 4or di marduga, a pesar cu e evento mester a caba 3or di marduga.