Despues di keda registra den AruBig, AZV ta celebra momento transcedental; Dr. Geraldine Croes ta haya decreto y contract mesora cu AZV pa traha como dokter di cas

Ken por a pensa cu apenas tres siman despues cu e prome dos dokternan di cas ta haya nan registro di AruBig, ya e siman aki a firma e prome contract entre AZV cu un di e dokternan aki, cu ta dr. Geraldine Croes. Asina Director di AZV, ir. Edwin Jacobs, MSc a bisa ayera, na momento di a registra pa bira pacient di e dokter, cu awor ta reemplaza dr. Veringa kende a entrega su retiro for di AZV. “Ta un momento transcendental pa cuido na Aruba.”

Ayera, den oficinanan di AZV, Minister di Salud Publico Dangui Oduber, Ehecutivo Medico di AZV Joost Samuels y dr. Jayburtt Dijkhoff di e Instituto Calidad di Salud, e Director General di AZV y dr. Croes a firma e contracto cu ta nifica cu entrante Diahuebs awor, e pacientnan di dr. Veringa ya tin nan propio Dokter di Cas.

“ArubaBig ta transcendental pa cuido di salud publico di Aruba. E ta pone un base sumamente importante pa atende un di e tres dimensionnan di sostenibilidad di cuido den e proximo añanan.”

E prome ta e aspecto financiero unda mester determina si por sigui carga e cuido di salud di e forma cu a bin ta haci. E otro aspecto ta e factor social, ya cu mester crea acceptacion pa prioridad y escohencia cu mester haci den proximo añanan. E di tres ta e aspecto di personal, y awor AruBig ta yuda pa cumpli cu e demanda di cuido y e personal rekeri. Segun Jacobs, rond mundo tin escases di dokter y enfermero y Aruba mester di busca forma pa yega na e dokternan di cas, esnan di prome liña di cuido, pa sigura su calidad di salud. Si keda enfoca unicamente riba esnan cu ta studia na Hulanda of otro pais di Union Europeo, lo haya problema pasobra e paisnan ey mes ta confronta cu falta di suficiente profesional.

Dokternan di cas tin un papel esencial den e sistema di cuido na Aruba. Mester percura cu e acceso na e prome liña di cuido keda accesibel y pagabel pa comunidad. AruBig a reconoce dos instituto na Colombia y tres na Costa Rica cu ta cumpli cu e calidad cu AZV ta desea pa e cuido na Aruba. Den caso di dr. Croes, el a gradua na Universidad El Bosque, na Bogota, Colombia.

Datonan

Na 2019, a registra 200 mil consulta na 47 dokter di cas. Si proyecta, a base di crecemento natural di población teniendo na cuenta malesanan cronico y embehecimento, ta premira cu na 2030, aseguradonan lo  yega na 219 mil consulta. Den e plannan ta cu ta bin un reorganisacion y restructuracion di e cuido den di dos liña,  pa motibo cu hopi cuido di specialista por keda den man di dokternan di cas. “Esey ta implica cu ta bin 10 mil consulta adicional na 2030. Pa por atende cu e 229 mil consultanan aki, cu lo costa AZV 26 miyon, compara cu e 20.5 miyon florin di 2019, nos lo mester di alrededor di 56 dokter di cas. Na e momentonan aki tin 45 dokter di cas.” Y si mester inclui un immigracion modera, ta proyecta 240 mil consulta na 2030, cu ta rekeri 60 dokter di cas pa percura cu nivel di cuido y accesibilidad ta keda na nivel di 2019.

400 mil versus 150 mil

Desde 2009, Aruba hunto cu institutonan Hulandes ta brinda e specialisacion di dokter di cas na Aruba mes. E Director di AZV ta puntra si Aruba, cu e programa aki, tin e potencial pa produci e dokternan di cas cu mester na 2030, ya cu di e 45 dokter di cas cu tin awor, 14 lo yega edad di pensioen na 2030. Pues, pa 2030, lo mester como 29 dokter di cas adicional. “Entre 2009 y 2021 a logra forma apenas 18 dokter di cas,” Jacobs a sigui splica, mustrando cu e areglo no ta yuda Aruba yega na e cantidad di profesional di prome liña di cuido cu mester pa garantisa e cuido cu tabata dun ana 2019. “Aki AruBig ta habri e oportunidad pa nos. No solamente pa atrae profesionalnan, sino pa nan formacion tambe. Tin hopi presion pa baha gasto. E ta nifica cu pa cada florin cu AZV ta gasta un florin, mester bolter e mesun florin varios biaha. Na e momentonan aki, e formacion di un dokter di cas na Aruba ta costa 440 mil florin. Na Colombia, e formacion di dokter di cas, cu ta accepta pa AruBig ta costa 150 mil florin.”

Na e momentonan aki tin varios studiantenan ainda den e programa di specialisacion pa caba como dokter di cas, pero AZV hunto cu Gobierno ta evaluando si e ta hustifica pa paga asina hopi pa un specialisacion na Aruba, si tin alternativa mas barata y di mesun calidad na Colombia.

“Esaki ta pa ilustra e importancia di AruBig pa cuido na Aruba. Si nos keda pisca den pool di Europa, unda tin escases, ta bira dificil pa coi pisca. Ta importante e ora pa hunto cu Ministerio di Salud pa determina kico ta bira e forma pa atende cu e necesidad di dokternan di cas pa 2030,” Jacobs a sigui bisa.  “E ta un ‘ball-game’ nobo.”

Dr. Croes, naci na Aruba a caba su specialisacion na un instituto acredita na Colombia, segun Minister di Salud Publico Dangui Oduber, kende a enfatisa cu AruBig ta usa organonan di acreditacion pa determina cua ta e institutonan na Colombia y Costa Rica cu por brinda dokternan cu kier bin Aruba e posibilidad pa registro di AruBig. “Dr. Geraldine Croes ta e prome dokter di cas cu a specialisa su mes y a keda acredita. P’esey mes nos ta firma su decreto y e por firma su contract cu AZV.” E Minister a sigura cu AruBig lo brinda yiunan di tera porfin e oportunidad pa haya nan acreditacion. E ta contento cu apenas algun siman despues di a registra profesionalnan den AruBig, y awor caba uno ta drenta den servicio di AZV. “E ta un momento historico, ta brinda panorama nobo, unda yiunan di tera por sigui specialisa na Hulanda, pero tambe den region, na Merca, Canada, Costa Rica y Colombia y drenta e registro di AruBig.” Minister Oduber ta gradici AZV di a kere den e proyecto.

Dr. Croes di su banda tabata hopi contento cu su contract y a bisa cu “e ta un honor y mi kier gradici tur esnan cu a traha duro cu awe AruBig ta un realidad y asina duna chens na tur dokter den region, pa nan por specialisa y contribui na salud di Aruba.”

Despues di e acto oficial, sr. Jacobs a yena e formulario pa por bira pacient di dr. Croes, kende lo ta na San Nicolas. Riba e pregunta si e Director di AZV ta dispuesto pa bay te San Nicolas pa su dokter di cas, el a contesta cu awendia kier promove medicina riba distancia, unda dokternan di cas por haci uso di medionan digital pa comunica cu nan pacient. “Ademas, AZV tin oficina na San Nicolas tambe.”