(AP) – E vehiculo su luznan a briya contra un hoben canando su so den awasero na un parti aparta na Francia cu un skateboard bao su man. “Mi a bisa mi mes, ‘esey ta straño, ta 3or di mainta y e mucha aki ta canando su so riba caya,’” chauffeur di delivery Fabien Accidini a conta.
For di e punto aki, e storia ta keda bira mas inusual. E hoben a resulta di ta Alex Batty, un hoben di 17 aña di Reino Uni, ken tabata desaparecido desde aña 2027. Autoridadnan Britanico y Frances a confirma riba diabierna cu e hoben cu Accidini a haya e siman aki ta e mucha cu a disparce cu 11 aña, tempo cu su mama y welo a hib’e na un vakantie di 2 siman na Spaña. Na luga di un vakantie di 2 siman, el a resulta di ta un odisea di 6 aña via Maroco, Spaña y Francia, bibando un bida ‘off-the-grid’.
E hoben a conta investigadornan Frances cu su persona, su mama y su tata a muda di cas pa cas, cargando nan propio panel solar, cultivando nan mesun cuminda, bibando cu otro famianan, meditando y comtemplando reencarnacion y otro topiconan similiar. “E tabata un bida nomadico,” oficial di polis Lea Chambonniere a expresa. “E unico constante tabata e cosnan cu nan tabatin cu nan, e panelnan solar y nan matanan di berdura.” E hoben a dicidi di bandona e bida aki y a separa for di su mama despues cu el a bis’e cu nan kier muda atrobe bay Finland, segun fiscal Antoine Leroy. Su persona y Chambonniere a revela tur e informacion den un conferencia di prensa. “Ora cu su mama a indica cu e tabatin intencion di bay Finland cune, e hoben a compronde cu e bida aki mester stop,” e fiscal a sigui splica.
E hoben a conta cu e no por a usa e termino ‘secta’ pa splica con su mama, welo y Batty a biba. “E termino cu el a usa ta un ‘comunidad spiritual’. Nunca a cer’e, pero e tabata obliga si di biba den e condicionnan aki,” e fiscal a agrega. Batty a cana pa 4 anochi, descansando durante dia, y tabata come “loke e por a haya den veld of hardinnan” prome cu e chauffeur a haya e hoben. Batty a conta cu e tabatin intencion di yega Toulouse, cu speransa cu e autoridadnan lo yud’e bolbe Reino Uni unda e por reuni cu su wela, ken tabatin su custodia prome cu el a disparce como un mucha. E fiscal a informa cu Batty lo bolbe Reino Uni e fin di siman aki.
“Mi no por cuminsa expresa e alivio y felicidad cu mi ta sinti awo cu Alex a ser haya safe y bon,” e wela, Susan Caruana a bisa den un declaracion publica pa polis Britanico. “E tabata un bon sentimento di por tende su stem y mira su cara. Mi ta hopi emociona pa tin e back cu mi.”
