Minister di Husticia, Andin Bikker a referi na dos incidente cu a capta atencion y cu nan a yega di sosode den diferente instituto escolar, un na Colegio Arubano y otro na Scol Cacique Macuarima na Santa Cruz, unda varios klas a resulta seriamente afecta pa causa di un candela eventualmente intencional.
Mirando e dos suceso desafortuna aki e mandatario a informa cu siman pasa nan a delinea e ampliacion di e maneho pa preveni crimennan di impacto halto poniendo atencion riba joyeria, casino, hotel, banco, etc.. Pero nan a dicidi di amplia parti di e maneho aki pa preveni y combati cualkier atentado como siguridad pa nos scolnan.
Nan a institui un comision of task force di expertonan cu ta bay duna asesoramento na diferente instancia of establecimento, y tambe scolnan pa determina kico nan tin implementa caba riba tereno di siguridad den general. Minister Bikker a menciona cu nan ta yegando na un acuerdo entre otro cu Leen van der Plas kende ta autor di e buki Proactief Beveiligen & Predictive Profiling.”
El a bisa cu Leen van der Plas tin un bon cooperacion cu Academia di Polis na Aruba. E filosofia tras di esaki ta pa un forma pro-activamente nan ta wak con nan por sigura pa medio di tecnologia y infrastructura e localidadnan, entre nan scolnan. Pero tambe e filosofia tras di esaki ta pa pre-detecta caba a base di profile of perfil e personanan cu kisas tin mal intencion of inclinacion pa pone siguridad di e localidad den peliger.
Situacion.
Minister Bikker a laga sa cu nan por a constata cu un e-mail a drenta na Colegio Arubano. Den e-mail aki un persona ta adverti cu un mucha of mas lo tin intencion di bin cu un tiramento. “Esaki a wordo tuma sumamente na serio,” e mandatario a bisa.
Ya den transcurso di siman pasa caba, polis y tur instancia concerni tabata atendiendo e asunto aki. Tambe ayera mainta e mandatario di husticia a tene un reunion cu directiva di SMOA cu ta e fundacion cu ta maneha cu Colegio Arubano, y tambe cu e rector di e instituto aki. Nan a delibera riba e situacion di advertencia tocante un supuesto tiramento den Colegio, y nan a bin tuma paso pa implementa sistema di siguridad den dje.
Encuanto e situacion na Scol Cacique Macuarima, e mandatario gewoon a referi na dje, pero e no a bay den detaye pa no stroba e investigacion cu ta tumando luga aworaki. Pero si el a cualifica esaki como ‘un incidente di vandalismo.’ Den e scol aki tabatin candela caminda cuater klas a sufri daño. Actualmente tanto polis tecnico y tambe brandweer a inicia un investigacion y tin cierto indicacion cu ya caba algun sospechosonan relaciona cu e echo aki a wordo identifica.
