Diabierna ultimo durante entregamento di lista, Benny Nisbet di PPA a anuncia cu e ta laga e liderazgo di e partido pa un candidato hoben. Ta trata aki di Kar-Lie Marielourde Ng kende tin basta tempo caba activo den mundo di politica. Tambe a wordo conoci cu PPA y UPP lo entrega un lista combina cu un total di 20 candidato entre e 2 partidonan. Por nota cu e cambionan aki a bin den un tempo hopi cortico.

Desde 1986 cu Aruba tin su ‘Status Aparte’, tabata tin diferente biaha partidonan cu a participa cu un lista combina. Por ehempel den 2005 entre partidonan ALIANSA y MSA; tambe den mesun aña entre PPT y SB. Den 2009 tabata tin e combinacion entre OLA cu MSI. Esaki ta partidonan cu a combina lista y a logra haya suficiente firma pa participa den eleccion.

E entrega di lista ta e prome fase den e proceso pa partidonan politico por participa den eleccion. Pa partidonan cu no tin asiento den parlamento actualmente, tambe ta conta e rekisito cu mester haya un minimo di 587 firma (e eleccion aki) di votadonan pa por participa.

E lider nobo di partido PPA a bisa den un comunicado cu e tin un tempo ya caba envolvi den politica, entre otro riba lista di Democracia Real (PDR) y PPA. E candidato y lider nobo di partido PPA ta splica cu: “Mi a papia extensamente cu ex lider sr. Nisbet tocante e situacion di e pais y con mi lo kier contribui na e mehoramento di esaki. Mi tin estudio di HBO den finanza y economia y mi ta siguiendo un estudio na nivel di Masters den Internationaal Belastingsrecht. Di e manera aki mi ta sinti cu mi ta un candidato ideal pa e partido aki riba e puntonan cu nos a pone dilanti.”

Den e comunicado di sra. Ng tambe a clarifica e programa y plannan di e partido. “Nos prioridadnan como partido y como combinacion di lista ta entre otro pa soluciona e crisis financiero y economico di nos pais. Tambe nos lo kier traha riba problemanan social actual.”

Segun e relato, e maneho financiero di gobierno ta uno importante pa e partido. Segun sra. Ng, “Nos como lista combina kier baha gasto di gobierno cuminsando cu baha e cantidad di minister pa 7. Tambe pa baha e cantidad di empleadonan den ministerio. Y sigur door di haci un analisis general pa baha gastonan di gobierno.”

Tambe segun e relato, e partido lo enfoca riba “Good Governance” y enseñansa. Ora ta papia di good governance ta referi na e transparencia di procesonan gubernamental y e control di diferente organonan di gobierno. Riba aspecto di enseñansa ta enfoca riba un maneho cu lo haci enseñansa gratis gradualmente y trece mas inversion den alumnonan y maestronan.