Diabierna Asamblea Nacional, parlamento di Venezuela, domina pa un mayoria di diputado di oposicion, a nombra 33 abogado como  magistrado nobo, cu obhetivo di traha den Tribunal Supremo di husticia. E decision aki ta desafia Tribunal supremo di Husticia, pasobra e institucion aki a bisa, cu hues cu oposicion a  nombra como magistrado, lo por bay prizon, pa delito di “usurpacion di funcion”.

Ultimo lunanan di aña 2015, parlamento di Venezuela, cu tabata domina na momento ey pa mayoria di diputado di gobierno, a nombra 13 magistrado principal y 20 suplente pa traha den TSJ. E proceso a ser critica pa grupo di oposicion, pasobra e proceso supuestamente tabata pura y cu iregularidad. Parlamentario di oficialismo a nombra magistradonan, par di dia prome  cu oposicion a gana eleccion  y asina nan a asumi mayoria den parlamento. “Nos no lo detene, Venezuela lo tin un tribunal supremo di husticia y tur institucion pa servicio di nan pueblo, y no pa servicio di un presidente di turno, y tampoco pa ningun partido politico,” Carlos Berrizbeitia, diputado di AN a bisa,  durante un sesion na Caracas.

Magistradonan cu a bay ayera na AN, a keda huramenta.
Luisa Ortega Díaz, Fiscal General di Venezuela a denuncia algun iregularidad riba nombramento na 2015 di e magistradonan, cu awor parlamentarionan a dicidi di cambia, pa motibo di iregularidad den nan  nombramento.  Ortega a declara tocante e nombramentonan aki, varios siman despues cu el a dicidi di aleha di politica di gobierno di Maduro, ora cu el a critica tambe e decision di maximo tribunal di Venezuela.

E pleito entre podernan na Venezuela ta profundisa mas ainda e crisis politico di e pais aki, caminda miyones di persona a sali pa protesta riba caya, desde luna di april contra gobierno di Nicolas Maduro. Diahuebs Tribunal Supremo di Husticia a splica den un comunicado cu “Sala Constitucional di Tribunal Supremo di Husticia a declara e proceso cu Asamblea Nacional lo realisa como nulo, ora cu nan purba di nombra un grupo di magistrado como funcionario nobo di maximo tribunal di Venezuela. TSJ a splica cu e periodo di nombramento di hues actual no a vence ainda. P’esey nan ta considera cu e proceso ta nulo. Organo di husticia a bisa cu esunnan cu lo eherce funcion publico civil of militar indebido,  lo keda deteni pa delito di “usurpacion di funcion.”

33 magistrado titular di TSJ  tin como funcion dicidi tocante, si ta existi of no algun motibo pa acusa presidente di Venezuela, asina como tambe vice-presidente, ministro, diputado, diplomatico y otro funcionario di  administracion publico.  Nan tin como funcion tambe purba di soluciona conflicto entre tur poder publico y  dicidi riba aplicacion di leynan cu por keda aproba den Asamblea Nacional.

Constitucion di Venezuela ta bisa cu miembro di poder publico, manera ta magistrado di organo di husticia, mester tin  aprobacion di 2/3 parti di miembro di parlamento, pa asina legalisa nan nombramento.