Despues di e crisis cu Covid-19 a crea den sector laboral; Segun FTA, “practicamente tur empresa a bolbe na normalidad”

Ora cu pandemia Covid-19 a haci su presencia na Aruba na maart di 2020, miles di persona a confronta cu un situacion desagradabel ora nan a perde nan trabao of hasta sufri di algun di tipo di abuso di parti di nan doñonan di trabao.

Durante un conferencia di prensa, Hose Figaroa, vice-presidente di Federacion di Trahadornan di Aruba (FTA) a expresa cu e aña y mey cu a pasa no tabata un tempo facil pa nan; pero pa loke ta trata empresanan sindicalisa, cu tin un relacion cu FTA, “tur e empresanan ey nos a logra yega na entendimento durante e punto mas dificil di e crisis, como tambe aworaki cu e parti mas fuerte di e crisis ta parce cu a mengua un poco.”

Nan a señala cu nan a cera acuerdonan cu casi tur empresa cu ta afilia na FTA na momento cu nan tabata na e punto mas dificil y aworaki mientras tanto, “practicamente tur empresa a bolbe na normalidad” manera Figaroa a duna di conoce.

El a bisa como ehemplo, cu cierto empresanan a bay di acuerdo pa reduci su oranan di trabao na 80%, a reduci pago na 80%, entrega cierto beneficionan pero mientras tanto, tur e empresanan afilia a logra normalisa tur cos caba y tur beneficionan a bolbe, hasta cierto salarionan a regularisa.

“Di e banda ey nos por bisa, durante e parti mas dificil di e crisis nos a haya hopi meld pero na mesun momento nos a deal cu nan, nos a cera acuerdonan cu tur empresa y nos ta contento di bisa cu den tempo ey tabatin comprension mutuo di tanto e parti di trahadonan y di empresanan pa cu e situacion, cu a wordo normalisa pa tur empresa afilia”, Figaroa a manifesta.

Asina mes, FTA a anuncia cu diaranson awor 15 di september lo tin su congreso constitucional number 25 cu nan na ta considera hopi importante na momento di crisis pero na mesun momento nan ta evalua kico ta e situacion di e clase trahado, principalmente di nan miembronan. No solamente di e momento aki actual sino tocante kico ta nan perspectivanan y nan futuro.

Cu un total di 90 delegado cu lo participa den e congreso aki, Hubert Dirksz na unda e ta fungi como presidente di e federacion, e ta considera cu esaki ta un highligth pa nan por anuncia pa comunidad cu nan ta un sindicato serio y cu nan ta haci nan best den tur e dificultadnan cu nan por tin pa nan trata di cumpli lo miho posibel pa e trahado, su famia y nan miembronan cu nan problemanan ta wordo atendi y nan por haya un progreso por medio di un CAO of tambe pa tene un bon relacion cu dunado di trabao, caminda cu nan por influencia cambionan di ley pa por garantisa un miho futuro pa e clase trahado.