Ayera mainta durante un conferencia di prensa na Baby Beach, Minister di Turismo y Salubridad Publico, Dangui Oduber a anuncia continuacion di ehecucion di e Proyecto Baby Beach Waterfront Promenade cu a planea y a cuminsa desaroya algun aña atras. Minister Oduber a brinda informacion di kico e siguiente fase aki ta encera y kico ta bay ta e siguiente pasonan pa e proximo fasenan cu ta bin despues.
El a splica cu na 2017, na momento cu Gabinete Wever-Croes a drenta gobierno, nan a prepara un masterplan conhuntamente cu Ministerio di Turismo, Aruba Tourism Authority (ATA), DOW, DIP y diferente otro partner. Prome cu e pandemia a cuminsa a pone e prome piedra di e proyecto di Baby Beach Waterfront Promenade pa cuminsa cu e ehecucion di parti di masterplan.
E masterplan aki ta consisti di e proyecto di Baby Beach Waterfront Promenade, embeyecemento, mehoracion di e infrastructura, percura pa tin comodidadnan pa local y tambe turista. Percura pa mehora e paisahe y haci tur e preparacion necesario. A tene e destaho publico y e proyecto a wordo gegund pa cuminsa net prome cu e pandemia.
Minister Oduber a sigui splica cu na momento cu e pandemia a yega nan mester a adapta y cambia e proyecto y partie den diferente fase. Nan a percura pa entrega e prome fase caminda a amplia e espacio pa parkeo y tambe drecha e acera, pero mayoria parti di e proyecto di Baby Beach no a wordo ehecuta pa motibo di e situacion di e pandemia. Esaki a ocasiona un atraso di sigur dos aña, durante cual practicamente nada a wordo haci cu e siguiente fase di e proyecto di Baby Beach Waterfront Promenade, cu ta forma parti di e masterplan integral di e proyecto di Sero Colorado, conhuntamente cu e proyecto di Rodgers Beach.
“Awe nos ta sumamente contento cu nos por anuncia continuacion di e siguiente fase di e proyecto di Baby Beach Waterfront Promenade”, Minister Oduber a expresa. E siguiente fase aki ta consisti di mas espacio pa parkeo. ta bay percura pa organisa y structura esaki miho, ta bay bin un rotonde despues di bahada ora cu ta yegando Rodgers Beach y Baby Beach.
Tambe ta bay percura pa iluminacion di caya y lama y un mehoracion di e paisahe di henter e area. Ta bay move tambe e muraya cu tin actualmente y hala esaki mas patras pa crea mas espacio riba e lama pa e local- y turistanan. Tambe ta bay construi dos kiosko cu ta bay ta destina pa cuminda y bebida pa provee tur e necesidadnan necesario y e kioskonan ta bay tin baño tambe.
Banda di esaki, Minister Oduber a indica, na mesun momento nan ta bezig tambe cu e diseñonan pa renoba e espacio na unda e canchanan di tennis ta, pa converti esakinan den actividadnan deportivo multifuncional cu por wordo usa como canchanan pa beach tennis, beach soccer, beach volley, tennis y basketball.
Minister Oduber a remarca cu Gobierno di Aruba tin un rol importante pa desempeña ora ta papia di economia di e pais y tambe e turismo. Gobierno, el a subraya, kier fungi como e catalisador di inversionnan cu tin cu haci pa mehoracion di infrastructura, mehoracion di producto Aruba; y asina nan deseo ta pa tambe sector priva sigui e tendencia aki pa nan tambe haci inversionnan necesario hunto cu Gobierno di Aruba.
“Nos a nota esaki tambe den e proyecto aki di Baby Beach. Na momento cu nos a anuncia e proyecto aki algun aña atras como parti di mehoracion di infrastructura di henter e area aki, nos a nota cu tin hopi mas interes di inversionistanan pa haci inversionnan den e area aki”, el a agrega.
El a sigura cu unabes e proyecto aki wordo entrega ta bay tin henter un area cu tin un mehoracion no solamente den espacio di parkeo, pero di henter e infrastructura, di e manera con ta bay organisa y esaki, Minister Oduber a subraya, ta duna un balor agrega tambe na turistanan cu awendia ta buscando mas e balor pa e placa cu nan ta inverti den nan vakantie.
“P’esey ta asina importante pa Ministerio di Turismo hunto cu Gobierno y ATA keda haci inversionnan necesario den producto Aruba pa nos mantene e producto Aruba competitivo pa ora turistanan bishita Aruba nan ta nota cu inversionnan continuo ta wordo haci di parti gobierno y tambe sector priva pa mantene pais Aruba competitivo”, el a bisa.
Minister Oduber a comenta cu conforme e maneho, conforme e vision cu Gobierno di Aruba ta ehecutando hunto cu tur e partnernan, tin un gran cantidad di proyecto di infrastructura cu nan ta bay ta bay ta anunciando den e proximo siman- y lunanan cu ta bin cu ta forma parti di e maneho di enfoke riba mehoracion di producto Aruba pa mantene Aruba como un producto di calidad y competitivo contra tur e otro competidornan den e region.
El a agrega cu e specificacionnan di e proyecto aki ya caba ta disponibel desde 12 di augustus na DOW. E destaho publico mes ta bay tuma luga dia 9 di september y ta premira cu e proyecto ta bay dura entre tres cu cinco luna pa wordo ehecuta. Unabes e proyecto aki wordo finalisa y entrega, e minister a indica nan ta planeando caba e siguiente fase di Baby Beach y tambe e siguiente fase di masterplan di Seroe Colorado cu ta bay mester bira e desaroyo di Rodgers Beach cu ta na turno e y conhuntamente cu Aruba Tourism Authority, DOW, DIP y tambe e fondonan di Tourism Product Enhancement Funds (EPEF), nan ta bay traha pa asina por yega na e fondonan pa haci e inversionnan den mehoracion di e area di Rodgers Beach.
