Despues di dos aña cu a mester a pone stop na competencianan pa motibo di e pandemia di COVID-19, deportistanan di taekwondo ta back ariba mat competiendo. Den un entrevista cu Bon Dia Aruba, Monica Pimentel, fundador y coach di Impact Taekwondo Aruba y tambe coach di e seleccion nacional di taekwondo, a conta con tur e competencianan internacional y nacional a bay y kico tin pa futuro tambe.
Pimentel a conta cu e prome competencia internacional cu nan a bay e aña aki tabata na Forth Worth, Dallas cual tabata un international open y tambe un sanction event di Merca. Un sanction event, Pimentel a splica, kiermen cu atletanan cu ta bay competencia ta busca ranking points y akinan nan ta haya muchanan di Merca cu tin hopi bon nivel ta competi tambe.
El a sigui splica cu e atletanan a competi den tur dos evento, tabatin algun otro hende cu a bin di afo y e muchanan haya un preparacion tambe pa e siguiente evento di competencianan internacional cu lo tuma liga den luna di mei.
Pa e competencia aki e atletanan cu a biaha pa Forth Worth, Dallas tabata e rumannan Joshua y Jourde Klaber cu ta dos atleta hopi conoci den e mundo di Taekwondo. Joshua Klaber a gana dos medaya di oro den e categoria di peso bao di 58 kg y Jourde Klaber a gana un medaya di oro y uno di brons den e categoria di peso bao di 63 kg.
Pimentel a menciona tambe cu tabatin otro dos atleta, dos mucha muhe di Aruba di su scol Impact Taekwondo cu a bringa den e categoria cadette cu ta 12 aña, Alisha y Ayleen van Gene. El a splica cu e mucha muhenan aki a caba di muda poco tempo pasa pa Merca y door cu nan ta gusta e deporte di biaha nan a train y nan a bay topa Pimentel na e competencia.
Pa loke ta trata competencianan local, Pimentel a indica cu e prome competencia local cu nan a organisa a tuma luga dia 26 di februari. Esaki tabata un competencia cu Impact Taekwondo Aruba a organisa hunto cu Stichting Tiger Taekwondo Academy despues di dos aña sin organisa competencia. Den e competencia tabatin participacion di cinco scol y 60 mucha.
Durante e competencia aki tambe Impact Taekwondo Aruba a empata como best team di e competencia hunto cu Tiger Taekwondo Academy.
Den fin di siman, ariba 26 di maart tabatin un competencia organisa pa Aruba Taekwondo Bond y den e competencia aki tabatin 7 scol y 80 atleta cu a participa. Durante e competencia Impact Taekwondo no a logra bay cu e titulo di best team pero un di e atletanan di e scol a logra bay cu e titulo best athlete den e categoria infantil, cual tabata Stuart Smith Jr. yiu di Stuart Smith un ex-atleta di taekwondo cu a conkista diferente medayanan den diferente competencianan importante.
Pa loke ta trata su scol mes, Impact Taekwondo Aruba, Pimentel ta indica cu una bes cu tur hende a cuminsa sinti cu covid ta mas bao control hopi mayornan ta buscando pa pone nan yiunan den deporte back y Impact Taekwondo definitivamente a sinti esey.
“Nos a haya diripiente un overflow di mucha, nos mester a pone mas les y mas actividad tambe pa e muchanan. Aworaki mi tin un overflow di trabou cu mi no ta custuma cune, mi mester adapta na esey tambe. Pero definitivamente mi ta kere aworaki e scol ta mas grandi cu nunca, nos tin mas cu 50 miembro y e ta hopi leuk cu aworaki nos por haci competencia pasobra e parti competitivo ta importante pa e muchanan”, el a expresa.
El a remarca cu nan ta mirando e posibilidadnan pa bay afo cu e muchanan di Impact Taekwondo tambe. Tin e competencia den mei caminda Ayleen van Gene ta bay participa, cu ta ex-alumno di Impact pero aworaki e ta biba na Merca. Y den luna di juli tin otro competencia cu nan tin bista riba dje y el a splica cu nan tin porta dos atleta mas den mente cu lo por participa den e evento aki.
“Nos ta pushando pa e tres atletanan aki di Impact cu ta cadette pa nan por haya chance pa nan por participa den e Panamericano. Esaki en realidad a keda pendiente prome cu covid y aworaki nos ta contento cu nos por bay afo cu nan pa nan por midi nan nivel y nos ta spera cu nos por bin cu bon resultado tambe”, Pimentel a agrega.
Pimentel ta conoci no solamente pa su trabou como coach di taekwondo y pa funda su scol Impact Taekwondo, pero tambe pa su participacion den diferente competencianan internacional representando Aruba, specialmente durante e olimpiadanan di 2016 na Rio.
Pa loke ta su carera, el a conta cu aworaki e ta enfoca ariba coaching. “Despues cu mi no a cualifica pa e olimpiadanan di Tokyo, mi a bisa cu esey tabata mi ultimo ciclo olimpico, dus mi por bisa cu mi a retira como atleta for di e deporte, pero mi ta keda activo den e deporte semper”, el a finalisa.
