Despues di dos aña, ainda SECA no tin contesta di parti di Gobierno di Aruba

Ya ta bay haci dos aña cu Stichting End Child Abuse, cu nan movemento “Ta Basta” a cuminsa cu nan lucha pa trece cambio den e sistema hudicial pa loke ta trata e tema di abuso sexual di mucha. Den un entrevista pa Bon Dia Aruba, Sr. Danny Marquez ta conta e trayectoria cu nan mester a cana, y cu nan ta canando ainda, pa logra nan meta.

Sr. Marquez ta conta cu nan lucha a cuminsa dia tres di juli 2020. Den aña 2020 solamente nan a entrega cuater carta na Parlamento di Aruba, Gobernador y Ministernan. E prome carta cu nan a entrega tabata consisti di 18 punto, pero lamentablemente no a ricibi respuesta ariba esaki. Dia 6 di augustus nan a organisa un town hall meeting unda nan a invita tur hefe di instancianan y ministernan concerni, pa sinta na mesa pa pasa riba e 18 punto cu nan a presenta den nan prome carta.

Despues cu ningun di e hefenan di instancianan, ni e ministernan concerni a presenta na e reunion aki y sin ricibi respuesta ariba nan carta ainda, grupo Ta Basta kier a organisa un manifestacion cu auto y asina a logra haya atencion di Sr. Glenbert Croes, Minister encarga cu Asuntonan Social e tempo ey y Minister Andin Bikker, ex-minister di Husticia.

“Nos a logra haya atencion di Minister Glenbert Croes y Minister Anding Bikker e tempo ey y nos a bolbe entrega un manifiesto, pero nos a agrega tres punto mas, dus awo ta 21 punto. Nos a pidi nan pa haya respuesta for di nan, nan a manda nos sinta cu Social Crisis Plan y nos a sinta cu nan varios biaha. Pero cada biaha cu nos kier yega na un acuerdo oficial tocante nos puntonan mester bay pidi minister y esey ta tarda dos pa tres siman. Y na dado momento nos a stop di sinta cu nan, pasobra nos a wak cu ta manera un wega e ta. Tur punto cu nos trece toch mester atencion di minister y nos kier atencion di ministernan pa nos sinta di biaha riba e puntonan pa dicidi si por hacie si of no”, Marquez a bisa,

El a splica cu den e manifiesto nan ta hasta stipula un tempo specifico pa cada un punto – di un pa cuater luna, un pa seis luna y di un pa nuebe luna – pa Ministernan por indica un tempo mas o menos cu nan lo duna pa realisa e puntonan ey. Pero nan no a tende nada mas tampoco.

Den luna di april ora cu Gobierno di Aruba a renuncia, nan a bolbe manda un carta tocante tur e cartanan cu nan a entrega caba y Marquez ta bisa cu tur nan cartanan ta bay Parlamento y Gobernador, pero for di Gobernador tampoco nan no a tende nada.

Na momento cu formacion di Gobierno a bin, nan a entrega otro carta pa pidi screening di parlamentario, minister, coordinadornan di Gobierno, di tur persona cu ta traha den gobierno –pasobra, segun Marquez ta señala, nan tin indicacion cu hopi hende cu ta traha den gobierno ta mishi cu mucha – y nan no a haya niun respuesta riba e carta ey tampoco.

E ultimo carta cu SECA a entrega tabata 25 di november 2021, na unda nan a pidi pa e parlamentarionan yama un reunion tocante abuso sexual di mucha, cu tur e lidernan di fraccionnan y parlamentarionan, pa asina pasa ariba 21 puntonan den e manifiesto pa wak kico por wordo cambia.

“Presidente di Parlamento, Sr. Edgar Vrolijk a bisa cu nan lo yama nos pa sinta na mesa, pero na 2020 nos a sinta cu Minister Glenbert Croes, Minister Andin Bikker y Social Crisisplan y nada a wordo concretisa. Nos a sinta cu diferente hefe di instancianan tambe y kico a wordo concretisa? Nada. Den 2020 nan a haci hoorzitting di abuso sexual di mucha, prome biaha nan ta hacie, y kico a wordo concretisa di e hoorzitting? Nada”, Marquez a señala.

Na 2021 durante e proceso di formacion di gobierno, nan a sinta cu formador di gobierno, Sra. Evelyn Wever-Croes pa bolbe splica kico e puntonan ta, cual manera Marquez ta indica, nan tabatin caba pasobra nan a entrega cuater diferente carta caba. “Pero Minister President a bisa cu e no tin e puntonan, locual ta un poco non chalant y a cay hopi malo den e grupo”, el a bisa.

Marquez ta subraya cu aworaki a yega na e punto cu nan no ta bay sinta cu niun hende mas. E aña aki, den algun luna nan ta cumpli dos aña cu nan ta bezig ta vociferando tur e problemanan di tur e instancianan, manera por ehempel Voogdijraad, cu e ta indica cu nan ta ricibi hopi keho di e maneho di Voogdijraad.

“Nos ta wardando, nos ta spera anto, cu Gobierno di Aruba asumi su puesto y responsabilidad y Parlamento tambe pa nan yama reunion. Unico manera cu nos lo sinta cu nan ta si nan yama un reunion tocante abuso sexual di mucha den parlamento y cu nos grupo tambe por participa y nos ta check hurista, check e parti di leynan, cambio di maneho, mehoracion di instancia etc.”, Marquez a agrega.

Algo cu si el a remarca ta cu JZP, recientemente a termina un curso pa interogacion di mucha, locual den su opinion ta algo hopi bon y el a informa tambe cu nan ta poniendo material pa e verhoor kamer di e muchanan. Pero el a indica cu ainda falta, pasobra den un verhoor kamer mester di un psicologo di mucha tambe pa interogacion. Esey tambe ta un punto cu nan tin den nan manifiesto,

Pero di e resto di nan puntonan nada mas a cambia. Durante e prome gobernacion di Gabinete Wever-Croes unda Minister Glenbert Croes tabata encarga cu Asuntonan Social y Minister Andin Bikker tabata encarga cu husticia, e Ministernan a bisa nan ta trahando ariba algun di nan puntonan pa trece cambio pero nada no a wordo concretisa.

“Si Social Crisis Plan funciona, den cual nan a hinca 38 miyon florin, aworaki nos castigonan mester ta mas halto. Pasobra aworaki bo por haci interogacion miho y e rapport cu bay OM ta mas pisa, cu mas informacion, cual ta duna e hues mas espacio pa duna un pedofiel un castigo mas severo. Esey no ta pasando pasobra no tin un bon investigacion”, el a argega.

Marquez a señala cu JZP ta haciendo su best pero tin falta di material, falta di hende y nan falta mas cursonan. “E ta hopi bon cu nan a haya un certificado cu awo pa dilanti nan por haci miho interogacionnan, pero ainda falta drecha e verhoorkamer”, el a bisa.

Por ultimo el a indica cu poco poco e cosnan ta cana, pero e ta bay hopi slow. El a menciona cu Gobierno di Aruba a sinta pa papia tocante e contract di Eagle LNG pa dos dia largo, pero nan no por sinta pa papia tocante e ley di abuso sexual di mucha, drecha e maneho y mehora e instancianan. Local ta demostra cu e tema aki no ta un prioridad.

“Nan ta bisa hende ta central pero nos ta bay haci dos aña cu nos ta bringando pa esaki. Mehoracion di instancia, adaptacion di maneho y cambio den ley no ta riba un liña. Mi ta compronde pa gobierno e no ta facil, pero si bo no cuminsa nunca nos no ta bay yega na un miho sistema hudicial pa tema abuso sexual di mucha. Y nos ta wak cu e no ta prioridad”, el a finalisa.