Despues di debate… Opcion pa goberna…?

Cu e debatenan tras di lomba, y faltando menos di un siman pa eleccion tuma lugar, di berdad nos por papia di e recta final, unda esun cu ta desea di haci un diferencia electoral ainda, lo mester ta hopi creativo, y rapido. Ken lo logra esey ainda ta un pregunta cu nos no por contesta. Mas interesante ta kico por saca di e opinionnan treci dilanti durante e debatenan y tambe hopi entrevista cu nos por a scucha o mira den ultimo simannan.

Un di e puntonan clave den e evaluacion aki di loke nos ta mira y tende ta cu ta cuminza aparece un base pa yega na un gobierno – di coalicion – cu ta tuma como punto di salida cu tin un acuerdo cu Hulanda pa haya ayudo financiero, y cu esaki ta mara na un paquete di medida di reforma cu mester ehecuta den e proximo añanan. Claro cu esaki no ta implica cu eventual partnernan den un coalicion lo ta di acuerdo cu tur detaye di e acuerdo manera e ta conoci te awor, tampoco cu e propio ley y e derechonan di influencia cu gobierno di Aruba tin den esaki te awor. Esaki tambe lo ta importante pa un colaboracion den Reino cu ta garantiza e progreso cu ta busca. Ademas, den e ehecucion di tur esaki lo bin dilanti decenas, no, centenares di detaye unda dentro y entre e partidonan lo tin diferencia di opinion cu lo pidi pa solucion, pa por sigui move. Pero, y esey ta esencial, ta existi tambe e realismo cu esaki ta e unico ruta cu Aruba conoce na e momento aki pa sali di e cataclismo den cual nos ta hinca awor.

Di otro banda, segun nos opinion ta existi poco posibilidad pa esnan cu ta opone e acuerdo logra yega na un mayoria den parlamento, y seguidamente logra cambia algo fundamental den e acuerdo existente. Ta facil pa den un debate o entrevista pretende cu e acuerdo cu Hulanda ta fruto di ‘debilidad’ di e actual mandatario y nada mas. Y cu despues di un eventual victoria electoral ta bay Hulanda pa pone e mandatarionan Hulandes ‘na nan lugar’. Aunke sa bisa nos cu nos no mester haci comparacion cu Corsou henter ora, den e caso aki si. Djis wak kico a pasa cu e ‘guerreronan’ di e partido mayoritario awor den gobierno aya, cu a cuminza gruña manera un tiger adulto y awor caba a bira un ‘kitten’ di tamaño ignorable. Gara voto a base di mal informacion na pueblo ta un cos, enfrenta realidad despues ta ‘otros cien pesos’. En todo caso, nos no ta anticipa cu desde otro siman esey ta bira e scenario cu lo habri pa nos. Y ni si acaso esey sucede, e no ta cambia nada na e tareanan gubernamental monstruoso cu e gobierno lo tin su dilanti, unda actitud beligerante lo ta solamente contraproductivo.

Bisando esey, nos por conclui cu tabatin un proceso satisfactorio di campaña electoral? Talvez den seno di un partido por pensa asina, pero nos no por considera e nivel abao di informacion algo positivo. Aunke den e ultimo debatenan e preguntanan a cuminza bira mas skerpi, tabatin hopi momento unda como audiencia bo tabatin e sentimento di “ki ora bo ta bay contesta e pregunta?” Pa gran mayoria, a keda colga den observacionnan general cu no ta significa nada. Tambe, manera nos a comenta anteriormente caba den e Editorial aki, hopi biaha nos tabata duda si ta cautela pa no bisa algo robez, o ta falta di conocimento di e tema ta haci cu e contestanan no ta yuda pa nada. Di e banda ey sigur e publico no a haya loke e tabata merece, aunke lo tin hende cu a keda contento cu e contesta vago ey, no conociendo e realidad su tras. E sentimento ey nos a haya ora den e ultimo debate di Camara di Comercio a haci pregunta encuanto e maximo di 10% di GDP cu gobierno lo por bay gasta na salario di e aparato publico. No a haci mencion di cuanto esey ta, asina cu a haya un cantidad di sugerencia cu no ta yega mes na e suma enorme cu esaki representa. For the record: tumando manera e acuerdo ta bisa, aña 2020 como base, esaki ta implica corta 20% den cinco aña, te cu 2025. Esaki riba un payroll total cu na 2020 tabata alrededor di 680 miyon florin. Ta trata di un suma di decenas di miyon pa aña… Esaki pasobra nos no ta papia di e empleadonan publico na e ministerionan, sino tambe di tur salario cu gobierno ta paga, di sector subsidia, uitzendbureau, VUT, etc. Ora bo tende seguidamente un candidato bisa cu no mester kita hende, pero mester stop di lease auto caro, bo ta haya e sensacion cu e no tin e minimo idea di kico ta e alcance di loke ta papiando den e acuerdo. Y esaki mester bay representa nos? No cu nos ta pro pa sigui lease auto caro, pero esaki semper ta ‘pennies’ compara cu e miyones cu mester corta.

Menos mal cu, banda di nonsense genuino, nos a tende suficiente punto positivo pa kere cu ta posible forma un gobierno cu sa kico mester haci. Aunke mester keda vigilante pa percura pa nan hacie tambe, pasobra esey ta loke no a mira ainda.