Mientras dos teremoto mas a keda registra, atencion den e trabao di rescate a haya un otro tono momentaneamente cu e resate di un lora. E pahra a keda rescata riba di cuatro dia despues di e teremoto na Mexico, ora cu a scucha su gritonan fuerte. El a keda bao proteccion di un famia cu e speransa cu su doñonan a logra sobrevivi.
Riba e di cuatro dia di intenso operativo di rescate entre escombro cu e teremoto a laga na Mexico, cada vez ta keda menos escena alentador. Segun cu e oranan ta pasa, ta mas tanto curpa di hende morto cu sobreviviente cu ta logra saca di e edificionan cu a cay den otro. Pero riba diasabra ultimo, un lora a alegra e escena den un edificio di colonia Lindavista (Ciudad di Mexico).
Bomberonan a ripara un movimento chikito entre e biga y blokkinan di concreto montona den un derumbe na e zona di Coquimbo. Despues di move e material, na a cuminsa scucha e animal, cerca di 100 ora despues di e sismo cu a caba cu bida di mas di 300 persona.
E pahra, cu señal obvio di susto, tabata e mascota di un di e residentenan di e edificio, segun medionan local a informa. Na e mesun lugar e rescatistanan a haya un sobreviviente y por lo menos nuebe fayecido.
“Lucas”, manera esnan presente a yama e animal, a keda na man di un famia bisiña, na espera di aparicion di su doño.
Mientras trabao di rescate ta continua, naturalesa a percura pa otro temblor di 5.8 riba escala di Richter, cu a sacudi costa di estado Chiapas, den sur di e pais. E sismo di diasabra a cobra bida di cuatro persona, di cual tres den capital Mexicano.
Mexico a keda sacudi atrobe ayera diadomingo cu un temblor di 5,8 grado riba escala di Richter, despues di e devastador teremoto di siman pasa cu a causa mas di 300 morto.
E ultimo sismo aki a tuma lugar 122 kilometer na suroeste di Tonalá, den estado Chiapas, cu epicentro den oceano Pacifico y a sucede den marduga di ayera, segun confirmacion di e Coordinador Nacional di Proteccion Civil di e Secretaria di Gobernacion, Luis Felipe Puente.
