Despues di bishita… E cas a keda mescos…

Despues di su bishita na nos isla e siman aki, e secretario di estado nobo di Hulanda sigur lo ta mihor y mas detaya informa tocante e situacion cerca nos. Si e bishita tabata fructifero pa gobierno y otro interesadonan pa papia cu e gobernante Hulandes, ta dificil pa huzga na e momento aki. Loke ta di spera ta cu en todo caso e bishita a contribui na un ambiente positivo loke por beneficia e colaboracion cu nos mester den e proximo añanan.

Cu tur esaki, tur e temanan grandi a keda mescos. E secretario di estado no a laga ningun duda cu e acuerdonan entre Aruba y Hulanda na nivel di gobierno a keda manera nan ta. Esey ta implica ningun cambio den e austerizacion den gasto di cuido medico (Afl. 60 miyon), y ningun cambio den e acuerdo di e 12,6% di austerizacion riba payroll di gobierno y entidadnan (semi)estatal.

Loke si a keda habri pa discusion ta con ta aplica e recorte aki, pero finalmente e resultado pa Hulanda ta keda mescos. Esaki ta un mensahe bon cla pa e sindicatonan, cu ta biba cu e speranza ainda cu den e aña coriente lo tin algo di haya back di salario corta. Nan por sinta na mesa cu gobierno tocante esey, pero nada mas. Honestamente e tema aki ta cuminza cansa hende; pakico no ta bisa e sindicatonan bon cla, cu te na aña 2024 ainda gobierno ta anticipa di tin un deficit di Afl. 64 miyon, aña 2023 un deficit di Afl. 109 miyon, mientras cu e aña aki mester fia Afl. 287 miyon pa cubri deficit di gobierno. Te cu 2024 ta fiando un 460 miyon florin extra, riba e debe gigantesco cu tin caba. E suma ey ta mas o menos loke gobierno na 2023 y 2024 lo gasta na payroll, es decir cu den tres aña nan ta gasta full un payroll extra cu mester fia! Nos no sa si e secretario di estado den conversacion mas confidencial cu nos promer mandatario a mustra riba e cifranan aki.

En todo caso el a reacciona riba pregunta di prensa, recordando nos cu Aruba tin un pobreza sustancial, loke ta exigi tuma paso. E no a relaciona esaki directamente cu e lucha di empleado publico, pero e no mester recorda nos mes cu ta trata di un grupo privilegia, cu a perde solamente 5% di nan salario mensual. Anto ainda gobierno ta corta su cara pidiendo Hulanda pa deshaci di palabracion haci y aproba pa duna e empleado publico algo back mientras ta fia mester fia pa haci esaki? Ademas cu, a pesar di e situacion precario, gobierno tin proyecta pa den e proximo añanan gasta mas na paga empleado. Pa 2022 ta gasta Afl. 8 miyon mas cu na 2021 (Afl. 430 miyon), y na 2023 y 2024 esaki ta bay na Afl. 458 miyon… Si gasta e suma di 28 miyon extra aki solamente na tuma hende na trabao, esaki ta encera tuma 280 pa 300 hende mas den servicio publico. Pero parti grandi di e suma aki lo bay na mantene un mecanismo cu tin gobierno horca, pero nan no ta elimin’e. E ta e aumento periodico ‘automatico’, e asina yama ‘periodiek’ cu ta conta pa tur salario cu gobierno ta paga na su empleadonan. Esaki ta percura pa un aumento di gasto tur aña, hasta si no tuma ningun hende na trabao. Nos a mira un cambio di ley yega parlamento pa caba cune? No, pasobra no tin intencion di haci algo al respecto. Basicamente gobierno ta anuncia aki, tambe na Hulanda cu “Tende, nos payroll ta sigui crece, nos no por yuda…”. Y nos pensando cu ta den crisis nos ta… Aparentemente ta existi crisis solamente ora ta conveni den e debate, pero ora tin e afan pa gasta placa na loke gobierno ta haya importante, no tin limite.

Sin embargo, e secretario di estado a haci algun bishita cu mester por a dun’e un idea ta unda e sapato ta preta. Un bishita na un instituto di cuido pa muchanan cu no ta bao tutela di nan mayornan mas. E mensahe ta cu e financiamento di gobierno no ta alcanza pa nan cubri nan gasto. Un bishita organiza na ultimo ora na dump di Parkietenbos – no pa gobierno – a resulta den un encuentro cu activista y habitante preocupa. No ta bay pa trata e temanan specifico ey, pero kico un secretario di estado Hulandes mester pensa di nos? Ta gritando semper cu mester defende nos autonomia, pero no ta esaki ta tipicamente e cosnan cu bo mes mester regla? Den e caso aki gobierno, no e ciudadano victima, cu tin pleno derecho di trece e cosnan aki dilanti, pasobra fuera di habitante di Aruba nan ta ciudadano Hulandes y tin derecho riba gobernacion drechi. Ta toca anto na un mandatario Hulandes pa mustra un gobierno insular cu nan mester tuma rienda den e tipo di asunto aki; e no ta responsabilidad di Reino. Ta gobierno mester baha gasto den cosnan menos util pa tin placa pa paga cos prioritario. Y di esey, nos no ta mira mucho. En todo caso ta di spera cu e secretario a haya un bon impresion pakico nos pais – autonomo – ta unda e ta. Y, despues di e bishita, nada no a cambia ainda.