Ministro di Transporte y Sector Primario, Cris Romero, ta nenga cu el a duna instruccion na Kustwacht pa no controla e pesca riba seis especie cu ta riba e lista di animal protegi, describi den e Ley di Naturalesa. Segun e mandatario en todo caso no ta seis, sino solamente tres.
Asina e Ministor a bisa cu e informacion cu Bon Dia Aruba a trece dilanti no ta corecto y cu e hecho cu a publica esaki, e corant no a actua responsable.
Romero a sigui bisa cu dia 22 di Januari ultimo, Conseho di Ministro a dicidi di prolonga e paro riba e control riba cierto especie cu ta aparece riba e lista di proteccion bao di e ley di proteccion di naturalesa. Na februari 2020, a pone un paro riba e control di cierto especie, pa haci cierto estudio. “Esaki a trece confusion. Door di haci esaki nos a haci diferente estudio,” e Ministro a sigui bisa.
Bon Dia Aruba a skirbi cu Ministro Romero a para implementacion di e ley di Proteccion di Naturalesa. Esaki absolutamente no ta berdad, Ministro Romero ta insisti. “E Natuurbeschermingsverordening (ley di Proteccion Naturalesa) ta na vigor manera semper y landsbesluit Flora y Fauna ta na vigor y Kustwacht ta haci su trabao di controla.”
E mandatario a referi specificamente na loke Bon Dia Aruba a skirbi, cu no lo ta controla e pesca di gutu. “Absolutamente cu no. Kustwacht ta keda controla riba gutu.” Pero mesora cu tras, e Ministro a añadi cu “si tin excepcion pa un par di luna riba tres especie.”
“Si mi cuminsa riba djukfes, cu ta un tipo di Djampou. Si un piscado bay pisca cu liña y e djukfes por pega na su liña. E pisca aki ta basta grandi. E pega na liña, no por lag’e bay mas, pasobra el a muri caba. Esey nos ta mirando con por regl’e mihor pa piscador no haya problema. Esey ta e idea tras di wanta e control riba e especie aki. Esaki ta cierto cosnan cu mester tene na cuenta pa no hinca piscadornan den problema y cu mester tin balance,” tabata e comentario di Ministro Romero.
No ta seis especie, sino tres
Mester bisa cu Ministro Romero mes ta bisa cu tin un paro riba control riba tres especie cu ta riba e lista di proteccion. Bon Dia Aruba a publica cu e paro ta riba e control di seis especie, y e informacion aki a bin di un instancia hopi serio cu ta Kustwacht. Pues Kustwacht no ta verbalisa piscadornan cu tin kreeft, djukfes, dos tipo di tribon martiu, chuchu, y gutu pasobra ta esey ta e instruccion cu nan a haya y ta esey Bon Dia Aruba a cita. Y motibo ta e estudio cu awor Ministro Romero mes a confirma cu ta tumando lugar.
Manera a bisa anteriormente, Bon Dia Aruba haci pregunta riba e investigacion aki, pasobra ningun di e departamentonan concerni, sigur no Direccion di Naturalesa y Medioambiente, DNM, cu ta encarga cu e Ley di Proteccion di Naturalesa, ta na altura di tal.
Bon Dia Aruba un biaha mas a haci peticion na buro di Ministro Romero pa haya sa mas di e estudio cu ta tumando lugar, ken ta ehecutando e investigacion, cual ta e obhetivo, cuanto e ta costa y bao ken su autoridad e ta sucediendo. Ta wardando e contesta.
Aunke cu ta trata aki di pisca, y Ministro Romero ta responsabel pa pesca, e lista di animal protegi ta cay bao responsabilidad di Ministro di Medio Ambiente, cu na e momento aki ta Promer Ministro Evelyn Wever Croes. Ta Promer Ministro pues ta esun autorisa pa trece cambio den e ley, hasta si dicidi pa pone un pausa den e control riba un of mas di e especienan protegi. Bon Dia Aruba a tuma contacto cu Promer Ministro Evelyn Wever Croes pa puntra su opinion, y su reaccion tabata simpel: e no tabata na altura. DNM no tabata na altura tampoco.
Ministro Romero ta bisa cu Bon Dia Aruba a actua iresponsabel pa saca informacion cu no ta corecto. E informacion a bin di un instancia hopi serio cu ta Kustwacht. Es mas, aunke Ministro Romero ta bisa cu e articulo di Bon Dia Aruba no ta corecto, e mes ta bisa cu a dicidi pa no laga controla e pesca di cierto especienan protegi. No e gutu pero si por ehempel e djukfes. E discusion di e djukfes sinembargo ta algo diferente, pasobra e no ta toca e pesca cu harpun den areanan di coral.
Di tur manera, Kustwacht ta bao di e impresion cu no mester controla e seis especienan cu piscadornan a pidi pa saca for di e lista di especienan protegi, mientras cu Ministro Romero ta papia unicamente di tres especie for di e lista protegi, cu segun e no mester di controla pa awor. E pregunta ta keda di unda e confusion den comunicacion a bin, y si esnan autorisa pa para control y haci investigacion, realmente a haci esey. Eseynan ta ministro encarga cu Husticia y Promer Ministro encarga cu Medio Ambiente.
