Despues di basta rato wardando pa minister presidente na bestuurskantoor: Wever-Croes a atende sindicatonan expresando mal contento

Ayera tardi, sindicato di maestro SIMAR, di Aduana SADA y di Polis SPA a bay bestuurskantoor pa entrega na prome minister Evelyn Wever-Croes un carta pa asina pidi un biaha mas un reunion y sinta cu gobierno pa haya un clarificacion pa e preocupacionnan cu e miembronan di e sindicatonan tin.

Sindicato di Maestro SIMAR, su presidente Josephine Albertus a splica cu nan lo kier cuminsa cu e dialogo prome cu otro aña yega, pa haya informacion pa asina informa e trahadonan den nan campo, y tambe cu e tempo di conversacionnan cu Hulanda a cuminsa pa tin algo bon riba papel na unda nan por yega na otro.

Desde diahuebs ultimo, e sindicatonan aki den oranan di atardi a dicidi di pidi un reunion cu gobierno, “pasobra nos tin un gobierno cu ta dicidi riba su mes sin consulta cu sindicatonan”, presidente di sindicato di polis, Jose Dirks a bisa.

Tambe el a indica cu desde luna di mei nan no a tende mas nada riba un contesta cu nan ta wardando pa loke ta trata reduccion di nan salario. “Mi no ta wak cu pa otro aña e lo ta miho, e situacion ta bay ta mas pio ainda”, Dirks a expresa.

A trece dilanti cu na paisnan manera Hulanda, frontliners a haya bonus den temporada di pandemia di Covid-19, algo segun Dirks a sigura, aki na Aruba no ta e caso. “Akinan nan ta corta di nos, e ta hopi jammer cu nos tin un gobierno cu ta trata nos asina, mirando cu a nos ta e weso di lomba di e seguridad di e pais aki”, el a manifesta.

Manera a informa den edicion di ayera diabierna di Bon Dia Aruba, nan tin varios luna pidiendo un reunion cu gobierno y nan no a haya contesta. “Esey ta un falta di respet, pakico nan no kier sinta cu nos? Nan tin algo di sconde.” Pa e motibo aki Dirks a contesta cu nan a yega te bestuurskantoor pa por haci un dialogo y wak con leu nan por yega. “No por ta asina cu ta bisa cu no tin placa, pero ta lanta manage team. Bo por gaña nos cu no tin placa pero e realidad ta mustra full otro”, Dirks a bisa.

Pa loke ta trata e siguiente pasonan cu nan lo tuma, el a expresa cu esey miembronan lo dicidi pa asina wak kico nan por haci.

Edward Maduro, presidente di sindicato SADA, a bisa cu despues di e reunion cu a tuma luga diahuebs ultimo entre e diferente directiva, nan a dicidi di bay personalmente pa entrega un otro carta pa minister presidente. Tambe el a trece dilanti cu nan a reuni cu e miembronan di nan sindicato pa haya sa nan deseonan.

El a agrega cu parlamento a pasa un ley na unda parlamentarionan a haya reduccion di salario te 31 di december y despues nan lo haya nan salario normal bek, algo cu el a sigura cu no a tende si esey ta wordo aplica pa minister tambe. “Pa nos cu ta ambtenaarnan, cu ta homber chikito, si ta tot nader order”, Maduro a comenta.

Di mesun manera, el a señala cu nan ta wak cu gobierno ta tumando hopi decision pa lo cual ta trata finanzas, pa motibo cu gobierno ta bisa cu pais ta den crisis, cu no tin placa, pero manera el a sigura, nan ta haya informacion di contractnan y esey no ta husto pa ambtenaarnan cu tin cu entrega parti di nan salario. “Nos como sindicato ta haci loke nos miembronan ta desea, esey ta nos deber. Nos ta vocifera nan deseonan y aworaki nan ta sinti cu ta basta, nan ta sinti cu e tratonan cu nan ta hayando no ta corecto”, Maduro a afirma.

Despues di mey ora cu sindicatonan y miembronan a reuni dilanti di e porta di bestuurskantoor wardando pa minister presidente ricibi nan carta, y cu nan a haya e actitud aki como un falta di respet, hefe di seguridad a sali y a para na porta y bisa presidentenan di sindicato cu prome minister no por atende nan, ni ricibi nan carta, pa motibo cu e tabata den un reunion cu crisis team.

Por a compronde cu tabata mustra mal contento di e personanan di sindicato y miembronan cu a warda basta rato, pa despues e persona aki bisa nan cu minister presidente no por atende nan, pa loke a cera e porta na cara di e representantenan di sindicato. Actitud cu nan a haya como un falta di respet pa nan, cu tabata simplemente mustra y vocifera nan mal contento.

Minuutnan despues, e mesun persona a para den porta pa informa sindicatonan cu minister presidente no ta bay sali pa atende nan, sino cu e tres representante di sindicato tin cu drenta pa papia cune. Di esaki, mayoria di miembronan presente a contesta cu nan ta di acuerdo cu esey y nan a drenta pa papia cu Wever-Croes.

Te na momento di ciere di edicion aki no por haya detayenan di con e reunion a conclui entre sindicatonan y minister presidente, sinembargo, riba pagina 7 di edicion aki por lesa un comentario di Wever-Croes.