Ayera mainta a wordo anuncia cu cuerpo di aduana ta reforsa cu un grupo di 20 hoben cu lo cuminsa e proceso di formacion pa realisa e trabou delicado aki.

Esaki ta e prome grupo selecta despues di basta aña cu mester reforsa e cuerpo aki. Duana su personal a mengua basta ya cu un gran cantidad di nan a baha cu pensioen of bou areglo di VUT.

Integridad
Durante e acto aki cu a conta cu presencia di minister di Financia encarga cu departamento di Aduana, Angel Bermudez. Dos palabra a resona constantemente fei esunnan cu a hiba palabra: profesionalismo y integridad. Esaki den cuadro di e responsabilidad y tarea grandi cu duana tin di protege nos frontera y evita e presencia di articulonan of mercancianan ilegal ya sea droga of contrabanda, pero tambe terorismo. Nan mester percura tambe pa gobierno por haya entrada pa medio di nan trabou fiscal y di control.

Hoofd di opleiding, Siomaira Schwengle-Maduro, a enfatisa cu den e proceso di reclusion a pone enfasis riba e balornan moral di e organisacion. Nan a enfatisa riba aspectonan manera servicio na e cliente, integridad, moral y responsabilidad personal di cada participante.

Tambe riba e expectativa cu e cuerpo di aduana tin cu e grupo aki. Pa prome biaha nan a asigna mentornan cu lo bay guia e cursonan den e proceso di introduci nan mes den e trabou di aduana.

Director di Duana, Roderick Croes, a bisa cu tin espacio pa e grupo nobo por crece den cuerpo di Aduana. Pero esaki ta keda pa boso mes si boso nan kier crece pa medionan di e cursonan duna y pa resultadonan den nan trabou, segun e. Nan a tene cuenta cu cierto criterionan den consideracion pa selecciona e grupo elite aki. Nan ta un 10% di e candidatonan total cu a aspira drenta e cuerpo uniforma aki. Esaki ta haci cu nan mester ta orguyoso.

“Boso por ta orguyoso di boso nan mes. Mi ta kere cu boso por saca cara tambe y demostra cu boso a wordo selecciona pasobra boso ta bon”, segun Sr. Croes.

Minister Bermudez
E grupo aki di 20 hoben cu ta cuminsa cana su trayecto den Duana como Hulp Kommies, a wordo selecciona for di 200 candidato interesa pa forma parti di e cuerpo uniforma aki.

Minister Bermudez ta consciente cu e cuerpo aki mester di mas personal pa por yega na nan capacidad normal. Pero nan mester haci e proceso aki den grupo chikito, no mas grandi cu 20 pa 22 persona, cu nan por maneha debidamente. Pero tambe nan mester tene cuenta cu presupuesto pa recluta mas hende. E mandatario ta spera cu den aña venidero lo tin espacio financiero pa recluta mas candidato y asina reenforsa y pone e cuerpo di Duana na un nivel pa loke mester ta su capacidad.

Reduccion di personal
Cuerpo di Duana mester di mas personal pero den e maneho di gobierno di reduci personal fei aparato gubernamental, minister Bermudez a bisa cu e reduccion di funcionario publico ta pa reduci gastonan. Sinembargo esey bo tin cu hacie den totalidad. Pero naturalmente bo mester keda semper cu departamentonan cu bo tin cu mantene un cierto capacidad minimo pa realisa un trabou optimalmente, segun e mandatario. Algo asina ta conta pa ehempel pa e cuerponan uniforma di Polis, Duana, KIA, pero tambe pa nos cuerpo di enseñansa.

Nan ta departamentonan cu bo mester di e recursonan humano pa duna un bon servicio a base di loke ley ta stipula. Tur esaki mester wordo defini di un manera balansa y responsabel, segun e mandatario.