(AP) — Un corte di impuesto na Merca a duna un victoria grandi na herederonan di Michael Jackson den un bataya cu a dura varios aña, dunando veredicto cu IRS a infla e balor di activonan y imagen di Jackson na momento di su morto, loke a resulta den un cobransa di impuesto demasiado halto pa su herederonan.
IRS mester a calcula e balor di tres aspecto di balor di Jackson den disputa na momento di su morto na 2009, na alrededor di $482 miyon. Den su veredicto entrega dialuna, hues Mark Holmes a pone e cifra ey na $111 miyon, hopi mas cerca di e propio calculacion di e herederonan.
Ehecutornan di e estado a bisa cu tabata un victoria enorme y cla pa yiunan di Jackson.
“Nos ta complaci”, co-ehecutor John Branca a bisa AP diamars. “Semper nos ta purba di haci lo corecto. For di comienso nos a purba di cumpli cu regla y regulacionnan di IRS y a depende riba e miho expertonan posibel. Ta desafortuna cu nos a haya nos mes forsa pa tuma accion legal pa protege nos mes.
E hues a bay mas den desacuerdo cu IRS tocante e balor di imagen di Jackson. Mientras cu IRS a pone esaki na $161 miyon, Holmes a declara cu esaki tabata apenas $.4.15 miyon. El a nota cu a pesar cu a declara Jackson inocente di tur cargo den su huicio na 2005 pa abuso di mucha, e acusacionnan a keda su tras, y mientras Jackson tabata bende tur fecha planea pa un tour mundial na momento di su morto, e no por a haya un sponsor of partner di mercancia.
“E hecho cu e no a gana niun solo cen di su imagen na 2006, 2007 of 2008 a mustra e efecto cu e acusacionnan ey tabatin, y a continua di tin, te cu su morto”, Homes a skirbi den e decision di 271 pagina cu ta documenta fama y finanzas di Jackson durante mayor parti di su bida.
E disputa di impuesto a resulta den un cobransa di alrededor di $700 miyon despues di un auditoria di impuesto di 2013 riba e propiedad, cual su herederonan ta mama y tres yiu di Jackson, di alrededor di $200 miyon di esaki un multa pa paga di menos.
Un cobransa di impuesto nobo awo lo ser calcula usando cifranan di Homes, y no lo inclui ningun multa.
Tambe den disputa tabata e accion di 50% di Jackson den Sony/ATV Music Publishing, un catalogo cu ta inclui 175 cancion di The Beatles, y su interes den otro catalogo cu ta inclui cantica cu el a skirbi.
E experto di IRS a calcula e activonan aki na un total combina di alrededor di $320 miyon. E hues a haya cu esakinan, ambos combina, tabata apenas $107 miyon tempo di su morto.
E veredicto, spera durante añas, ta resolve un di e tiki disputa cu ainda tabata keda riba herencia di Jackson casi un decena di aña despues di su morto inespera dia 35 di juni 2009, despues di un dosis letal di e anestetico propofol.
Otro a keda resolvi un siman prome na momento cu un hues a rechasa un demanda entrega pa coreografo Wade Robson, un di dos homber cu ta aparece den e documental ‘Leaving Neverland’ cu a acusa Jackson di abusa di dje sexualmente tempo cu e tabata mucha. E demanda similar di James Safechuck, e otro homber den e documental, a keda rechasa na october. Abogado di e hombernan a bisa cu e decisionnan ta un precedente peligroso pa proteccion di mucha y cu nan tin intencion di apela.
Cu añanan di disputa resolvi y un retraso riba proyectonan pa motibo di e pandemia, e lidernan di e herencia ta sinti cu nan ta den un posicion excelente pa cuminsa promove legado di Jackson.
“Nos ta na un punto crucial absoluto”, Branca a bisa. “Mi ta kere hende mester cuminsa realisa cu Michael tabata inocente di cualkier cargo y incapaz di protege su mes. Nos tin un obra maraviyoso biniendo na Broadway, nos lo habri nos show di Cirque du Soleil back pronto y nos tin algun sorpresa na caminda.”
E hues a nota e exito enorme cu e herencia a mira desde morto di Jackson manera show, un pelicula di concierto y varios decision strategico pa bende activo.
Sinembargo, el a bisa, ta parce cu IRS tabata teniendo e exito aki na cuenta den su decision na luga di considera solamente e circunstancianan na momento di morto di Jackson, tempo cu cos tabata considerablemente mas scur despues di varios aña di popularidad disminui, mal maneho y gastonan descuida di Jackson.
E hues a burla di e baloracion inicial di e herencia di imagen di Jackson na apenas $2mil, sinembargo, bisando cu tabata pone ‘un di e celebridadnan mas conoci na mundo – e Rey di Pop – na prijs di un Honda Civic hopi usa 20 aña bieu.”
