Despues di ambiente di tension y turbulencia laboral: Tin consenso pa logra prome CAO na Parke Nacional Arikok

Mediador di Gobierno, Anselmo Pontilius a intermedia a purba di facilita un proceso di negociacion cu menos tension na Parke Nacional Arikok, despues cu e trahadonan, representa pa sindicato SEPPA, a yega di bay den accion. “Entre e partidonan tin bon comprondemento,” Pontilius a declara na Bon Dia Aruba.

E ta kere cu den e proximo lunanan por tin trankilidad un bes cu ambos parti lo por firma e CAO di 3 aña y duna trankilidad na e trahadonan di parke muy en particular riba e parti di nan posicion huridico.

Pontilius a declara na e matutino aki cu, despues cu e partidonan a acerca Mediador di Gobierno, tabatin varios reunion y nan a palabra un serie di fechanan pa reunionnan.

No solamente reunionnan pa trata loke lo bira e prome contracto colectivo (CAO), pero tambe nan a bin cu un palabracion riba operacion diario. Den e caso aki e fundacion cu ta maneha e parke nacional a prepara y adapta un cantidad di regla cu ta aplicabel den nan operacion diario.

E ta kere cu e Director nobo y gerencia di e fundacion encarga cu e maneho di e parke, hunto cu e sindicato, tin un comprondemento hopi cla con nan ta atende cu e situacion.

E reglanan aki, sindicato SEPPA a yega di discuti cu otro miembronan di gerencia anterior. Pero nan por mira cu den e reunionnan cu nan a yega di sostene, tabata dicidido pa keda cla cune. Practicamente den e reunion cu ta bay sigui den e proximo simannan nan lo keda cla.

Nan a opta pa sigui reuni den presencia di Mediador di Gobierno pa keda cla cu e reglamentonan cu ta inclui tanto e trahadonan como e gerencia di e parke. Un bes cu e ta keda cla, nan tin fecha mesora pa cuminsa negosha condicionnan di trabou. Loke Mediador di Gobierno a conseha nan ta pa incorpora e condicion di trabou existente como parti di nan prome CAO. Tambe pa concentra riba e puntonan mas urgente pa nan por bin cla cu nan prome CAO.

Igualmente, percura pa e gran parti di e trahadonan cu ainda ta pendiente ta e diferente posicion huridico di nan. Mediador ta compronde cu e proceso aki ta canando debidamente, aunke tin parti pa clarifica ainda.