Ayera mainta managernan di EPI, a tene un accion di 2 ora, caminda cu nan a mustra nan mal contento riba e trato cu nan a bin ta hayando no solamente for di directiva di e scol mes, pero tambe di gobierno. Sheila Tromp-Laso, presidente di Simar tabata t’ey presente pa asina demostra sosten na e miembronan.
El a splica cu nan a dicidi di pone trabao abao pasobra pa nan ta suficiente, cu nan tin mas cu 10 aña ta canando diferente caminda pa yega na un solucion y e sindicato ta cu nan desde Juni 2015.
Tromp a splica cu nan a bay diferente instancia, a papia cu e director di DPS, a papia cu Minister, a manda diferente carta y te ainda nan no a haya oido, si lo bay tin un solucion pa loke ta nan posicion huridico como manager y e derecho cu nan tin riba un aumento como tambe toelage.
E minister encarga cu enseñansa a priminti nan cu pa December lo bin claridad riba e organogram cu nan tin ta trahando pa basta aña. December a cera y awo den Januari ainda no tin claridad. Nan a haya un carta di minister, caminda cu nan lo haya un combersacion cu nan pa fin di Januari y nada ainda y esey tabata suficiente pa e managernan, segun Tromp.
Trahando bao di stress
E managernan aki ta trahando den un incertidumbre y bao di hopi stress. Tin Unit ta traha cu dos manager, tin cu tres, nan ta coy trabao di otro, pero nan no ta haya e gratificacion pa esaki. Tampoco no tabata tin periodiek, esey nan a logra pa yega na e diferencia den periodiek y tambe un toelage pasobra nan ta den funcion di maneho. Un rato nan ta wordo reconoci como tal, pero tin ora nan no ta wordo reconoci, pasobra hasta cierto poder cu nan tin como personal di maneho , ta wordo kita for di nan man. Riba dje ta bin awor aki un situacion cu e directorado nobo cu tur cos ta saliendo for di man. No tin comunicacion, no tin cooperacion y hasta contratiempo.
“Functiehuis”
E ta subraya cu den un di nan cartanan ta bisa cu nan mester warda riba e functiehuis cu ta na caminda, pa yega na un solucion. Como Simar ta den e stuurgroep y e grupo aki no ta hinca den e functiehuis ainda. E functiehuis cu ta algo cu ta bay pa futuro. Pero e hendenan aki ta wardando algo di 10 aña atras. Diferente minister a sinta a duna un oke, pero ningun hende a wordo poni disponibel pa haci esaki.
Ora cu un persona ta den un posicion di maneho, tin un diferencia cu e demas coleganan. Esey a bay di acuerdo cun’e, pero no a tende nada mas riba dje. Pa loke ta toelage, den personal di maneho ta haya 25% di toelage. Den preparatorio y scol basico ta haya 10%. Esunnan di EPI no ta hayando toelage. Riba dje nan no ta haya gratificacion pa e trabaonan cu nan ta haci, mirando cu nan ta tuma trabao di otro over. Por ultimo Tromp a splica cu e managernan ta eherciendo nan trabao y trabao di otro hende y esey ta un extra peso den e tarea y ningun hende ta para pa nan.
