(AP) – 6 aña despues di su album mas recien, Adele a revela riba diaranson cu su proyecto nobo, “30”, lo ta lansa dia 19 di november.

Un cantica inicial lo ser lansa riba diabierna, titula “Easy on Me.”

E cantante Britanico, ken a divorcia den aña 2019, a bisa den un publicacion riba e red social Instagram cu despues di a “lansa mi mes den un laberinto di desorden y turbulencia interno,” e ta sinti hopi mas miho.

“Mi ta cla pa finalmente por lansa e album aki y comparti esaki cu e mundo,” el a skirbi.

Cu hitnan gigante manera “Rolling in the Deep” y “Hello,” ambos di su albumnan anterior a keda entre 50 albumnan mas bendi den historia di musica.

E disco “21”, cual ta carga e titulo aki pa motibo cu e ta nombra su albumnnan den honor na e edad cu e tin na tempo di skirbi y crea e album, a lansa den aña 2011, y a bende mas o menos 31 miyon copia mundialmente. E album “25” a lansa den aña 2015, y a bende 22 miyon copia.

Cu servicionan di streaming manera Spotify awo dominando, no tin ningun manera cu Adele ni otro artista lo por logra e cifranan aki atrobe, sinembargo, e ta riba un nivel di popularidad cu solamente hendenan manera Taylor Swift por compara den e industria di musica.

E tin tambe mas o menos 6 aña leu di un medio unda cu e gusto di e consumidornan ta cambia di luna pa luna.

Den un entrevista cu Vogue recientemente, Adele a bisa “no tin un gran “Hello.” Pero mi no kier otro cantica manera esey. E cantica aki a lansa mi persona na un otro nivel di fama cu mi no kier pa pasa atrobe.”

Adele, ken actualmente tin 33 aña diedad, y su ex pareha Simon Konecki tin un yiu homber di 9 aña.

“Mi a sina hopi berdadnan duro tocante mi mes durante e proceso,” Adele a publica riba e red social Instagram.” “Mi a kita hopi diferente capa, y mi a envolve mi mes den capanan nobo. Tambe mi a descubri mentalidadnan genuino y efectivo pa sigui dilanti cune, y mi ta sinti cu porfin mi a haya mi sentimentonan atrobe. Mi lo hasta bisa cu nunca mi a sinti asina hopi pas den mi bida.”

Vogue ta describi “Easy on Me” como un “balada riba e piano cu ta saca tur bo sentimentonan for di bo.”

“E ta hopi sensitivo pa mi, e album aki, solamente den con hopi mi ta stima e album,” Adele a conta e revista. “Mi semper ta bisa cu ‘21’ no ta dimi mas. Tur otro hende a ricibi e album ey y a hinca e album den nan curason. Pero esaki mi no lo laga bay. E album aki ta di mi persona. Mi kier comparti mi mes cu tur hende, pero mi no ta kere cu e album aki lo bira di otro hende cu no ta ami.”