Recientemente Minister dr. Carlos Alex Schwengle conhuntamente cu AZV y notario a firma e finalisacion di Stichting Geestelijke Gezondheidszorg. Esaki a bin despues di 40 aña purbando di yega na un structuracion di e cuido aki.
E famia Ling tin un fundacion hopi importante y e mensahe cu nan ta purba crea ta pa kibra e taboe riba enfermedad di salud mental, cual tin diferente sorto manera psicosis, verslaving zorg y hendenan cu tin psicosis. Tambe ta purba crea mas comprension den comunidad cu tin hende cu problemanan mental psikico of psikiatrico y cu mester ta mas tolerante cu nan. Pueblo mester ta mas habri pa e tipo di problemanan aki y no sconde nan. Si na edad jong un hende tin problema mental y no a haya e atencion debido, e problemanan aki hopi biaha ta bira uno cronico.
Ta asina cu aña pasa e fundacion a wordo lanta y awo a concretisa esaki, unda cu a nombra 3 miembro y nan lo busca 2 mas pa e bira un formacion di 5 persona. AZV lo cumpra e cuido mental for di e fundacion aki.
Minister Schwengle ta bisa cu no lo kita nan derecho y lo trece tur trahado di SPD di gobierno,PAAZ na mesun nivel riba e concepto di e funcion di e fundacion y pone tur bou di SGG, pero cu e fundacion aki lo duna e claridad riba ki direccion e lo bay. Ministe Schwengle ta spera cu lo tin un convenio cu e partnernan y e fundacion por cuminsa fisicamente na Januari 2018. Aki ta unda cu PAAZ lo bay cay bou di SGG. Cosnan no lo bay con cu ta pero mester bin un bon acuerdo, unda cu PAAZ lo pasa pa SGG y tur trahado lo mantene nan derecho y obligacion.
Esaki ta e prome stapnan y ta bayendo den bon cooperacion. Ta pidi cooperacion y pasenshi na un y tur, Minister Schwengle a expresa. E fundacion aki ta pa yuda tur cu tin problema di salud mental, pero no mester trata nan den un forma apart pasobra na final tur ta keda ser humano. Un logro grandi sigur cu despues di 40 aña Minister Alex Schwengle ta logra esaki na bienestar di comunidad Arubano.
