Sra. Mericano Andranette “Anne” Anderson a wordo laga den libertad diasabra 10 di juli, despues di tabata encarcela pa 4 luna, hopi aki na Aruba a cuestiona su libertad. Mirando e crimen cu el a wordo acusa di a comete, algo asina segun comentarionan di ciudadanonan riba Facebook, bo no por “get away” cun’e na Merca.
E noticia di e libertad di Sra. Anderson a sali den prensa Mericano cual desde inicio (su detencion), a cubri desaroyo den su caso. Mescos cu ora cu finalmente Sra. Anderson a sali liber. Bon Dia Aruba a tuma contacto cu Ministerio Publico pa mas informacion di e caso aki y locual a motiva e asina yama “vrijspraak” di Sra. Anderson den e caso di posesion di arma di candela carga
Segun Ministerio Publico riba e fecha 21 di maart 2016, Sra. Anderson a wordo deteni. A haya den e parti dilanti di su maleta un revolver carga. Sra. Anderson e momento ey a wordo culpa di tin un arma di candela carga den su poder. Dia 8 di juli 2016 e hues a bisa cu Sra. Anderson ta wordo laga liber di tur culpa den e caso aki y a motiva su decision cu e siguiente informacion.
E sospechoso ta nenga cu e arma di candela cu a wordo haya den e parti dilanti di su maleta ta di dje, y ta bisa cu e no tin ningun conocemento di e arma y no tabatin conocemento mes di e arma. Sra. Anderson ta agrega cu e no tin ningun motibo tampoco pa trafica arma.
Esaki segun Sra. Anderson no tin sentido y mas aun mirando cu e arma di candela ta poni den e parti dilanti di e maleta, sabiendo cu tin e chens cu bo maleta lo mester pasa via di e mashin di X-ray pa control, cual ta haci e chens pa wordo gara hopi grandi. Tambe Sra. Anderson ta agrega cu no tin sentido pa e trafica arma pa Arkansas unda cu e ta biba y unda cu e tabata bayendo bek, como cu ta facil pa haya arma eynan y por obtene arma legalmente eynan. Hues a evalua e echo cu a haya e sospechoso cu un arma den su maleta ta wordo considera como algo grave y a evalua cu e tabata tin e arma ya prome caba.
Di otro manera tambe ta haya cu no tin un motibo cla pa dicon Sra. Anderson lo trafica arma. Contrario y sigur diferente na casonan di traficacion di droga segun hues, unda cu e motibo di traficacion di droga ta hopi cla, claramente placa. Acerca di esaki pa loke ta trata e imagennan di e camara nan di siguridad den e sala di salida di aeropuerto (cu ta duna imagen na movecion den henter e sala) no por descarta completamente cu un otro hende a pone e arma den e parti dilanti di e maleta. Un otro persona kisas lo por tabatin un motibo, por ehempel pa pasa e arma patras di area di siguridad sin cu nan core riesgo. Banda di esaki no tin mas informacion obtenibel di e arma. Tambe ta importante pa menciona cu un miembro di siguridad di aeropuerto a mishi e arma di candela cu su mannan, mirando esaki, a tuma fingerprint di Sra. Anderson tambe unda cu a prueba cu no tin su fingerprint riba e arma. Mirando tur e informacion nan aki cu a presenta e hues a indica cu e balansa ta na fabor di e sospechoso.
Medio internacional
Dialuna famianan y sernan keri di Sra. Anderson a tene un conferencia di prensa na Pine Bluff Community Center unda cu nan a papia di e experiencia di Sra. Anderson y su buelta bek for di Aruba. Nan a bisa cu nan ta kere cu via di a resa hopi e tabata posibel cu el a bolbe bek cas sigur, segun e pastoor Amelio Howard di Grace Temple Church, unda cu Sra. Anderson tabata atende y toca instrumento diadomingo. Segun e sernan keri, Sra. Anderson a depende riba su famia y fe mientras cu e tabata den prizon. Na e conferencia di prensa nan a celebra cu a kita e armband nan geel cu nan tabata resa cun’e pa Sra. Anderson mientras cu e tabata deteni. E famianan finalmente a indica cu Sra. Anderson ta bon y e no a wordo maltrata, awo e ta contento pa ta bek na su pais y cu e por continua cu su bida.
