A yega na mesa di redaccion cu Soul Beach Music Festival a anuncia cu e festival no lo bin mas Aruba despues di 24 aña ofreciendo conciertonan y entretenimento tanto pa turistanan como pa hende local. Mediante un comunicado cu e festival a publica riba nan rednan social y website e informacion a keda confirma.

“Nos mas sincero danki y aprecio pa boso fidelidad y sosten di Soul Beach Music Festival durante e ultimo 24 aña. Boso presencia, participacion y energia tabata e curason y alma di e evento, esaki tabata un experiencia espectacular y unico. Aunke e tabata un trayecto maraviyoso, y nos ta agradecido pa e hopi aña di exito, Aruba a dicidi di no extende nos partnership. Pues keda pendiente pasobra Soul Beach lo ta mudando pa un destinacion nobo y emocionante pa 2025 Mirando pa mas recuerdo inolvidabel ainda pa e añanan benidero. Nos ta topa na e siguiente fest,” e comunicado a indica.

Soul Beach Music Festival ta un festival hopi conoci na Aruba pa su conciertonan y publico exclusivo, specialmente Mericanonan cu cada fin di luna di mei tabata bin Aruba, pa loke ta trata e conciertonan por a recorda cu den su ultimo edicion a trece artistanan importante manera Mariah Carey, Boyz II Men y hasta Alicia Keys cu a bin na aña 2018, pa nombra algun di nan.

Aunke nan no a duna mucho detaye di e decision aki, e noticia a causa diferente reaccion di e hendenan, caminda algun di nan a duna na organisadonan di e festival palabranan di pabien pa e proximo evento y pa otronan ta un noticia lamentabel unda un di nan a bisa “esaki ta un tristesa pa mi curason, mi a asisti na e evento aki durante mas di 20 aña. Aruba ta mi isla y ta kibra mi curason cu Soul Beach no lo ser celebra aki mas, pero ainda mi ta desea nan tur emocion pa nan proximo ubicacion,” un usuario di rednan social a menciona.

“Nos no lo bay unda nos placa no lo ta aprecia, ta ora di un cambio,” tabata e reaccion di otro usuario.

Otronan a menciona cu “si lo tuma e decision di bay por ehemplo, Mexico, Republica Dominicana of Jamaica mester pensa riba seguridad como prioridad pa cualkier hende cu lo considera di bay pasobra no lo ta na Aruba mas.”

Sin duda, alohamiento, seguridad y e luga pa haci e evento mes ta bay ta un desafio pa hopi di e destino cu lo por scoge.