(Infobae) – Ecuador a habri su fronteranan back cu Peru na momento cu e sintomanan di malesa di Covid-19 den e poblacion a baha, y e avance di programa di inmunisacion a logra disminui e cifranan di mortalidad entre e personanan contagia. Segun Canciyeria Ecuatoriano e frontera a habri ayera 18 di februari.
Canciyer Juan Carlos Holguin a reconoce cu e decision aki a ser adopta den colaboracion cu gobierno Peruano, asina como Ministerio di Relacionnan Exterior di Peru. Pa esey a pone den marcha normanan di migracion pa traha den conhunto pa aplica tur medida di bioseguridad pa e transito.
E funcionario Ecuatoriano a sigura cu esaki ta un bon noticia pa e nacion, cu ta continua haci impulso di esfuerso pa revitalisacion di economia y reactivacion di turismo, cu a keda menciona den un conferencia di prensa, acompaña pa autoridadnan reuni na Comite di Operacion di Emergencia (COE).
Juan Zapata, presidente di COE nacional, a splica cu e fronteranan terestre tin e mesun rekisitonan cu frontera aereo, pa loke esnan cu drenta na e pais mester tin un certificado di vacunacion cu codigo QR, un carchi di vacunacion of un prueba PCR negativo den caso cu no a vacuna. E reapertura ta total, canciyer Juan Carlos Holguin a bisa. Na Colombia, e reapertura a tuma luga na december 2021.
Tambe nan a anuncia e eliminacion di e luz di trafico epidemiologico contra Covid-19 cu tabata implementa for di januari, a aumenta e capacidad di hende na luganan, a reestablece lesnan presencial den e sistema educativo general y no ta bay tin restriccion pa dianan festivo di Carnaval. COE a tuma e decisionnan aki despues cu a keda revela un rapport di Ministerio di Salud Publico (MSP) den cual tabata indica cu e malesa ta disminuyendo hunto cu e atencion medico y hende interna na hospital.
