Despues di 20 aña ta aproba medicamento nobo pa Alzheimers

(AP) — E prome medicamento nobo pa Alzheimer a ser aproba dialuna pa e oficialnan di salud di Gobierno despues di casi 20 aña sin medicamento nobo, sin tene cuenta cu e advertencia nan di consehero nan cu despues di hopi debate a constata cu te ainda no tin prueba concreto cu e ta yuda contra e enfermedad.

E agencia Food and Drug Administration (FDA) a bisa cu nan a tuma e decision di aproba e medicamento nobo di Biogen a base di resultadonan cu ta mustra “hopi probabel” di beneficia pashent nan di Alzheimers.

E ta e unico medicamento cu por trata e enfermedad den luga di solamente yuda maneha y surpasa e sintomanan manera ansiedad y insomnio.

E decision aki, cual por impacta miyones di Mericanonan y nan familiar, lo sin duda causa polemica y desacuerdo entre dokternan, investigadornan medico y grupo nan di pashent. Tambe, e ta trece implicacion pa e standard cu ta uza na momento di evalua terapianan y medicamentonan experimental, incluyendo esun nan cu ta demostra beneficio a lo largo.

E medicamento nobo aki, traha pa Biogen cu ayudo di Eisai Co. di Hapon, no a para ni combati e efectonan mental cu Alzheimers ta causa, sino solamente haci cu e proceso ta bay mas poco poco den un estudio. E medicamento, nombra aducamunab, lo ricibi e nomber comun aduhelm y ta pa suministra manera infusion cada 4 siman.

Dr. Caleb Alexander, un consehero di FDA ken a recomenda pa no aproba aduhelm, a bisa e tabata “sorprendi y desapunta” pa cu e decision cu a tuma.

“FDA ta ricibi e respet cu e tin pa motibo cu e tin un standard cu ta regula a base di evidencia nan firme. Den e caso aki, mi ta kere nan a duna e producto un aprobacion, pero no su eficacia” Alexander, ken tambe ta un investigador medico na Johns Hopkins University a agrega.

FDA su miho regulador di medicamento a admiti cu e medicamento tin algun aspectonan insigur na su alrededor, pero Aduhelm su “habilidad di reduci e grupo di placa nan dañino den e cerebro” ta spera di yuda haci e proceso di demencia uno mas poco poco.

“E dato ta sostene pashentnan y dunado nan di cuido cu tin e opcion di uza e medicamento aki” Dr. Patrizia Cavazzoni a bisa reporteronan cubriendo e caso. Tambe el a agrega cu FDA a haci un trabou hopi detaya na momento di midi y considera e necesidad di hendenan bibando cu e enfermedad “devastante y debilitante”. Bao termino di e aprobacion acelera, e FDA ta rekeri e trahado di e medicamento pa conduci un estudio despues di distribucion pa confirma e beneficio nan den pashentnan. Si e medicamento faya di comproba su beneficio nan e lo ser retira for di mercado, aunke un caso asina no ta hopi comun pa e agencia.

Biogen a bisa cu Aduhelm lo costa aproximadamente 56,000 dollar pa un aña di tratamento, agregando cu e prijs no lo subi pa e proximo 4 aña. Mayoria di e pashentnan no ta paga e cantidad aki pa motibo di cobertura di seguro y algun otro descuentonan disponibel. E compania a bisa cu su meta ta di completa e estudio di siguimento pa aña 2030.

Mas o menos 6 miyon hende den U.S y hopi mas mundialmente ta sufri di Alzheimers, cual gradualmente ta ataca cierto areanan di e cerebro cual ta necesario pa memoria, logica, comunicacion y tarea nan diario simpel. Den e etapanan final di e enfermedad, tin persona cu por perde e habilidad di guli. E carga mundial di e enfermedad, cual ta e causa mas comun di demencia, ta spera di aumenta mirando cu tin miyones di adultonan cu ta progresando y yegando e edad di 60-70 aña.

Aducanumab ta yuda deshaci di un proteina yama beta-amyloid di e cerebro. Otro medicamento nan experimental a yega di haci e tarea aki, pero no a logra haci un diferencia den e pashent su habilidad di pensa, cuida nan mes of biba di un manera independiente.